Prezidente Ramos-Horta hato’o solidariedade ba povu Filipina

DILI, 14 Novembru 2025 (TATOLI)–Prezidente Repúblika, José Ramos-Horta, hato’o ninia sentimentu solidariedade kle’an ba povu no Governu Filipina hafoin devastasaun ne’ebé kauza husi tufaun Fung-wong.

Notísia Relevante: Prezidente Filipina promete apoia Timor-Leste hodi harii ASEAN sai ‘forte liu’

Tufaun ne’e akontese iha rejiaun norte Filipinas, hodi rezulta lakon vida, dezlokasaun husi ema millaun ida-resin no estraga materiál sira-ne’ebé boot, iha momentu ne’ebé mak nasaun sei rekupera hela husi destruisaun ne’ebé mak tufaun Kalmaegi husik hela.

Iha karta formál ida-ne’ebé dirije ba Prezidente Repúblika Filipina, Ferdinand R. Marcos Jr.,  Prezidente José Ramos-Horta hato’o sentidu kondolénsia sinseru husi povu Timor-Leste ba vítima sira.

“Ho laran-susar tebes mak ha’u simu notísia trájiku kona-ba devastasaun ne’ebé kauza husi tufaun Fung-wong. Lori povu Timor-Leste nia naran, ha’u hakarak hato’o ba Prezidente, Governu no ba povu Filipinas, ha’u-nia sinseru kondolénsia no solidariedade Timor-Leste nian ne’ebé kle’an liu ba família sira, no-mós ba vítima sira-ne’ebé dezlokadu ka sofre tanba dezastre naturál ida-ne’e,” Ramos-Horta hateten iha nia karta ofisiál ne’ebé haruka ba Filipina, ohin.

Prezidente subliña liután, ligasaun partillada entre nasaun rua (2) ne’e, hodi hatutan povu Timor-Leste partilla ho povu Filipina sira nia laran-susar no kompaixaun durante períodu lutu no susar ida-ne’e, no Timor-Leste hato’o admirasaun ba korajen, reziliénsia no espíritu ajuda malu ne’ebé sempre karateriza povu Filipina nian bainhira hasoru susar.

Prezidente Ramos-Horta konklui ninia karta ho garantia ninia konsiderasaun no respeitu aas liu ba Prezidente Ferdinand R. Marcos Jr. hodi subliña lasu amizade no solidariedade ne’ebé besik entre nasaun rua ne’e.

Notísia Relevante: PM Xanana hato’o solidariedade bá Povu Filipina

Jornalista : Hortencio Sanchez

Editór        : Cancio Ximenes