BOBONARU, 17 Novembru 2025 (TATOLI)-Estrada dirasaun husi postu administrativu Bobonaru liga bá postu Lolotoe, munisípiu Bobonaru, liuliu iha aldeia Mologen, suku Oe-leu, ameasadu kotu tanba kauza husi dezastre naturál.
Komunidade António da Costa konfirma katak estrada ne’e besik atu kotu tanba estrutura rai la metin.
“Estrada ne’e nakfera kle’ur ona, foin lais ne’e mak balu monu tan, agora falta de’it metru rua liu hanesan atu kotu, tanba kareta rua bá-mai hasoru malu labele ona. Depois dalan ne’e kurva ne’e mak susar. Karreta boot sira tula sasán todan ne’e liu mak ita ta’uk, tanba rai iha kraik ne’e monu tiha. Se udan bo’ot tun tan agora nia bele kotu”, nia informa ba Tatoli, ohin.
Notisía relevante: Xefe suku Tapo husu IGEADI normaliza kondisaun estrada Oe-Leu ho urjénsia
Abitante Maculada Soares mós preokupa tanba estrada ne’e la dura ona. “Ami-nia estrada ne’e la sala halo iha 2010 la’e 2011. Uza la kle’ur de’it agora a’at fali ona. Sa’e husi Simpang Tiga mai to’o iha ne’e nakfera hotu ona, estrada monu barak ona”, nia dehan.
Nune’e nia husu ba ministeriu Kompetente atu tau-matan hodi s olusiona kestaun ne’e.
“Se la’e karreta sira atu bá Tapó, Leber ho Lolotoe para hotu, tanba dalan mak ida-ne’e de’it. Sira Loloto’e liu fali Atus mós kuandu udan hanesan”, Maculada realsa.
Provizoriamente, kondisaun estrada ne’e hela de’it ona espasu ba karreta ida. Tuir observasaun jornalista Tatoli iha terrenu, movimentasaun tranporte la’o normal.
Notisía Relevante: Kondisaun estrada Oe-Leu iha tempu udan grave
Jornalista: Sérgio da Cruz
Editora: Maria Auxiliadora
