DILI, 17 Novembru 2025 (TATOLI) – Governu liuhusi Ministériu Finansa (MF) kompromte hadi’a jestaun patrimóniu Estadu.
Primeiru-Ministru, Xanana Gusmão, agradese intervensaun husi deputadu opozisaun hodi fó hanoin kona-ba patrimóniu Estadu ne’ebé iha problema boot no Governu buka sei hadi’a nafatin.
“Atu refere de’it, problema ne’ebé fó mai, loos duni, ne’e problema boot tebetebes, ne’ebé ami husi Governu haree tiha ona, buka atu hadi’a,” Xanana hato’o hodi responde preokupasaun deputadu opozisaun iha debate proposta Orsamentu Jerál Estadu (OJE) 2026 iha faze espesialidade.
Deputada FRETILIN, Lídia Norberta, dehan Ministériu Finansa (MF) iha 2026 prevee sei hetan arekadasaun reseita husi Diresaun Jerál Patrimóniu Estadu ho venda kapitál millaun $3,602.
Maibé, nia aprezenta preokupasaun relasiona kazu balun tanba simu informasaun iha Diresaun Jerál ne’e katak, iha karreta barak xave lakon ne’ebé muda hotu ba parrajen kotuk no nunka foti asaun disiplinár.
Aliende karreta 11 mós xave lakon ne’ebé Governu hola hodi atende tula bainaka importante (VIP, sigla inglés) iha tempu Governu dahaat akollamentu eventu CPLP.
“No karreta barak xoke aat, laiha investigasaun,” nia dehan.
Nia hatutan, kona-ba dirijente balun iha diresaun ho nia karreta privadu aat lori hadi’a hotu iha diresaun. No iha mós karreta membru Governu balun hola ho montante boot rihun $60 lori ba patrimóniu Estadu kontratu fali kompañia privadu mak halo manutensaun.
Nia mós preokupa sirkulasaun veíkulu Estadu kontinua sirkula livre liu oras serbisu no tempu feriadu mezmu funsionáriu sira simu ona subsídiu.
Ministra Finansa, Santina Cardoso, rekoñese kazu balun iha patrimóniu Estadu.
MF kontinua halo melloramentu ba diresaun ne’e ninia dezempeñu mak atu halo rejistu ba patrimóniu Estadu bainhira kada instituisaun sira halo akizisaun ekipamentu no veíkulu ruma tenke rejistu iha sistema.
“Intermu aktu pesoál, patrimóniu Estadu nian iha kazu rua, iha prosesu auditória no halo prosesu ba CAC halo investigasaun kle’an, bainhira ema atu halo leilaun troka númeru xapa-matríkula ida husi karreta seluk,” nia hateten.
No garante karreta sira-ne’ebé laiha ona kondisaun liliu bainhira iha mudansa ba pesa ne’ebé dalaruma iha intensaun atu troka fali ba karreta seluk ba pesa ne’ebé aat sei halo melloramentu kontrola di’ak liután.
Tau atensaun mós hodi mellora tuir padraun jestaun manutensaun veíkulu Estadu. Aliende tau ona kámera vizilánsia ne’ebé iha atu monitoriza atividade.
“Patrimóniu Estadu hanesan iha área risku, iha auditória interna ministériu sempre tau atensaun ho rekomendasaun hodi halo melloramentu dezempeñu,” nia katak.
Governante ne’e dehan, kona-ba kontrolu sirkulasaun karreta Estadu hanoin iha dekretu lei ne’ebé kria ekipa konjuntu entre Diresaun Jerál Patrimóniu Estadu, PNTL, CAC, KFP hodi halo pasa revista.
Tanba Governu fó subsídiu transporte ba funsionáriu hotu atu utiliza veíkulu Estadu operasionál iha de’it oras serbisu no labele ba asuntu privadu.
“Loos duni, ami nota sei iha tempu barak ne’ebé dalaruma karreta Estadu, fila-fali ba konsiénsia ita hotu nian, maibé ami nafatin regra kontinua reforsa kontrolu,” nia hateten.
Notísia relevante: Parlamentu aprova orsamentu millaun $19,887 ba MF
Jornalista: Nelson de Sousa
Editór: Evaristo Soares Martins
