DILI, 17 Novembru 2025 (TATOLI)–Institutu Kualidade Timor-Leste (IQTL-sigla portugeza), Segunda ne’e, lansa ona servisu kalibrasaun iha ninia Laboratóriu Nasionál Kalibrasaun ne’ebé foin loke iha Bebora.
Prezidente IQTL, Izilda Manuela da Luz Pereira Soares, hateten inisiativa ida-ne’e atende preokupasaun ne’ebé hato’o husi Kámara Komérsiu Indústria Timor-Leste (CCI-TL-sigla portugeza) no Asosiasaun Emprezariál Feto Timor-Leste (AEMTL) kona-ba kualidade sasán no ekipamentu ne’ebé sira uza.
“Ohin IQTL atu fó-sai ba públiku kona-ba atividade ida-ne’e, iha laran ami iha ekipamentu ba atividade komersiál ho oin neen (6), ne’ebé daudaun ne’e IQTL oferese ona atividade kalibrasaun ba merkadu. Ne’e atu responde preokupasaun husi operadór ekonómiku hanesan ema sira fa’an modo iha merkadu. CCI-TL, AEMTL no atividade sira seluk, importante atu garante ba merkadu kualidade sasán ne’ebé ita uza,” nia dehan ba jornalista sira, Bebora, Dili, Segunda ne’e.
Nia hatutan atividade ne’e ein prinsípiu la’o hela lahó kustu, maibé tempu ida sei tau nia kustu. Ida-ne’e tanba ema hatene tiha lai ativiadade kalibrasaun nia modelu hanesan ne’ebé.
“Iha momentu ruma iha futuru, ami sei konsidera no introdús taxa ida. Maibé, iha faze inisiál ne’e, servisu hanesan gratuitu hodi ajuda públiku komprende modelu kalibrasaun nian”, Izilda tenik.
Nia esplika katak hahú ohin kalibrasaun bele hala’o hosi tékniku kompetente sira, no produtu ka ekipamentu ne’ebé kalibra ona bele uza kedas.
Laboratóriu Nasionál IQTL kobre área prinsipál neen:
- Massa –sukat todan ka masa
- Temperatura – sukat manas
- Dimensionál – sukat medida, naruk, ka mahar
- Presaun – sukat presaun hosi gás ka líkidu ida
- Umidade – sukat umidade anin nian ka materiál ida nian
- Forsa / Torke / Karga – sukat dudu, dada, ka torke
Lansamentu servisu kalibrasaun ne’e hanesan pasu estratéjiku ida ba Timor-Leste hodi garante kualidade ekipamentu no produtu ne’ebé públiku no setór ekonómiku uza.
IQTL ne’ebé ofisialmente koñesidu hanesan Instituto da Qualidade de Timor-Leste, nu’udár instituisaun nasionál ne’ebé hetan kna’ar atu garante kualidade produtu no ekipamentu iha Timor-Leste tuir padraun internasionál.
IQTL nia misaun mak atu garante kualidade produtu lokál sira liuhosi teste laboratóriu no emisaun sertifikasaun sira, hanesan Sertifikadu Análize (CoA-sigla portugeza), ne’ebé ajuda produtór lokál sira harii konfiansa konsumidór no fasilita asesu ba merkadu esportasaun sira.
Institutu estabelese ona Laboratóriu Kalibrasaun Nasionál no laboratóriu teste ai-han, ho finansiamentu ba sosa ekipamentu no reabilitasaun instalasaun. IQTL mós hasoru dezafiu sira hanesan ekipamentu no matenek ne’ebé limitadu, ne’ebé lori nia atu rekruta no fó formasaun ba tékniku sira, inklui liuhosi kolaborasaun ho instituisaun internasionál sira hanesan UNIDO no Institutu Padraun Nasionál Indonézia.
Aleinde ne’e, IQTL kolabora ho organizasaun lokál sira, inklui CCI-TL no AEMTL, hodi hadi’a padronizasaun produtu. Liuhusi servisu kalibrasaun no sertifikasaun, IQTL dezempeña papél estratéjiku hodi apoia produtór lokál sira hodi garante sira-nia produtu kumpre padraun internasionál no hasa’e kompetitividade Timor-Leste nian iha merkadu globál.
Jornalista: Osória Marques
Editór: Xisto Freitas da Piedade
