LIZBOA, 17 Novembru 2025 (TATOLI)-Sekretariadu Misaun Observasaun Eleitorál (MOE) husi g7+ realiza enkontru koordenasaun iha Lizboa, Portugál, hodi aborda atividade sira ne’ebé ekipa sei halo durante halo observasaun bá Eleisaun Prezidensiál no Parlamentár iha Giné-Bisau, ne’ebé sei hala’o iha loron 23 Novembru 2025.
Diretór Operasaun g7+, Felix Piedade, esplika katak reuniaun ne’e organiza tanba Komisaun Nasionál Eleisaun (CNE, sigla portugés) Giné-Bisau, iha tinan ne’e, la’ós konvida de’it g7+ husi Timor-Leste, maibé ba membru g7+ husi nasaun sira seluk hanesan Illa Salomaun no Saun Tomé no Prínsipe. Nune’e, antes arranka bá Giné-Bisau ekipa hasoru malu ho MOE husi membru g7+ hodi diskute ajenda importante rua mak kona-ba programa ne’ebé ekipa atu halo mak observa kampaña antes eleisaun no depoizde eleisaun.
“Ajenda seluk mak ami diskute kona-ba formuláriu ida ne’ebé sei uza atu halo observasaun durante misaun ne’e hala’o iha Giné-Bisau. Ohin loron ekipa membru sira iha ne’e kada ema fó sira-nia hanoin no sujestaun, nune’e bele asegura katak misaun ne’e bele la’o di’ak”, Felix Piedade relata ba Tatoli iha edifísiu g7+, iha Lizboa, segunda-feira ne’e.
Nia salienta katak atividade dahuluk ne’ebé ekipa MOE sei halo durante misaun mak halo reuniaun ho Prezidente CNE Giné-Bisau, halo observasaun bá kampaña kandidatu Prezidente no Partidu Polítiku sira.
“Iha momentu ne’e rasik atividade importante tebes ne’ebé ekipa sei halo mak observasaun bá eleisaun tomak iha 23 Novembru 2025, asegura katak ekipa ne’e halo observasaun ba prosesu tomak hahú husi abertura, votasaun no enserra eleisaun ne’e rasik”, nia dehan.
Hodi salienta katak atividade importante ida seluk mak ekipa MOE sei halo observasaun ba prosesu kontajen votu depoizde sufrájiu, tanba eleisaun ne’e rasik hala’o iha rejiaun tolu mak hanesan Bisau, Biombu no Oiu.
Felix informa, durante misaun, dentru oras 24 to’o 48 ekipa sei aprezenta relatóriu prelimináriu ba Prezidente CNE Giné-Bisau, liuhusi konferénsia imprensa.
Iha fatin hanesan, Xefe Misaun Observasaun Eleitorál, Christina Joanna Mitini, agradese ba Giné-Bisau, Komisaun Nasionál Eleisaun Giné-Bisau no Sekretariadu g7+ ne’ebé konvida ona nia hodi partisipa iha Misaun Observasaun Eleisaun ne’e rasik.
“Ho onra boot ba ha’u nu’udar reprezentante Illa Salomaun sai xefe Misaun Observadór Eleitorál nian ba Giné-Bisau, Illa Salomaun nafatin iha kompromisu ba misaun ida-ne’e no ha’u haraik-an atu reprezenta ita-nia nasaun iha esforsu importante ida-ne’e. Misaun ida-ne’e la’ós de’it atu observa prosesu eleitorál, maibé kona-ba reforsa valór sira dame nian, rekonsiliasaun, no governasaun demokrátika ne’ebé g7+ reprezenta”, nia afirma.
Hodi esplika katak sufrájiu Giné-Bisau nian iha loron 23 Novembru marka momentu sentrál ida iha viajen nasaun nian ba estabilidade no dezenvolvimentu sustentavel.
“Ita-nia prezensa koletiva iha ne’e simboliza solidariedade entre Estadu sira pós-konflitu, no fiar katak eleisaun ne’ebé kredivel, transparente, no inkluziva mak fatuk-inan ba pás ne’ebé dura”, dehan.
Nune’e hamutuk sei envolve ho parte interesada sira, monitoriza prosesu, no fornese avaliasaun sira ne’ebé imparsiál ne’ebé bele hametin konfiansa iha instituisaun sira no haburas koezaun nasionál.
“Prinsípiu g7+ fó hanoin mai ita katak laiha dame lahó rekonsiliasaun, nomós laiha rekonsiliasaun lahó dame. Ho espíritu ida-ne’e maka ami hala’o ami-nia serbisu. Ha’u hein atu serbisu besik ho ha’u-nia kolega sira ne’ebé ha’u hafolin, enkuantu ami kumpre ami-nia responsabilidade fahe iha misaun ida-ne’e”, nia subliña.
”Mai ita la’o hamutuk iha dalan ida-ne’e ho haraik-an, respeitu, no determinasaun, hodi garante katak ita-nia kontribuisaun ajuda Giné-Bisau atu hakat metin tan ba demokrasia no dezenvolvimentu”, dehan.
Iha reuniaun koordenasaun ne’e lidera husi Xefe MOE, Christina Joanna Mitini, Diretór Operasaun g7+, Felix Piedade, Diretór-Jerál Sekretariadu Tékniku Administrasaun Eleitorál (STAE), Elvino Fernandes Moniz, Sekretáriu-Jerál Komisaun Nasionál Eleisaun Repúblika Demokrátika Saun Tomé no Prínsipe, Melvim Nascimento Castro, Tékniku Protokolu no Parseiru g7+, Elísio Monteiro Valadares, no Asistente Pesoál g7+, Vítor Liu Gonçalves.
Notísia relevante: Ohin, ekipa g7+ dezkola bá Guiné-Bissau observa eleisaun prezidensiá no parlamentár
Jornalista: Arminda Fonseca
Editora: Maria Auxiliadora
