DILI, 17 Novembru 2026 (TATOLI)-Ministériu Justisa (MJ) kontinua tau atensaun iha proposta Orsamentu Jerál Estadu (OJE) 2026 hodi mellora atendimentu husi Servisu Rejistu no Notariadu ba públiku hanesan trata pasaporte no dokumentu sira seluk.
Vise-Ministru Justisa ba Fortalesimentu Instituisionál, Paulo Remédios, dehan daudaun stock kaderneta pasaporte pur volta rihun 19 mai iha no ba tinan oin kontinua tau verba hodi garante atendimentu.
“Loroloron halo melloramentu. Mákina no blanku la funsiona hanoin ne’e mai husi tempu Oitavu Governu iha difikuldade, maibé agora ita halo ona melloramentu, ema dudu malu laiha ona”, nia hateten hodi responde ba preokupasaun deputadu sira opozisaun iha debate proposta Orsamentu Jerál Estadu (OJE) 2026, iha Parlamentu Nasionál, ohin.
Vise-Ministru ne’e mós halo vizita bá munisípiu hotu ho koordenasaun ho Ministériu Administrasaun Estatál (MAE), liuhusi balkaun úniku hodi disponibiliza blanku no mákina ba atendimentu.
Deputada CNRT, Cedelízia Faria dos Santos, dehan iha OJE 2026 Governu aloka rihun $913-resin ba akizisaun pasaporte.
Durante diskusaun espesialidade OJE 2026 ba MJ nian, deputadu opozisaun FRETILIN no PLP aprezenta proposta adisionál rihun $82 atu foti husi Dotasaun Jerál Estadu iha Programa Jestaun Finansa Públika hodi tau fali iha Ministériu Justisa iha Programa Asesu Justisa ho atividade jestaun serbisu rejistu sivíl no kriminál, liuliu aumenta verba akizisaun pasaporte hodi garante atendimentu di’ak ba sidadaun sira, maibé parte Governu la aseita proposta referida tanba iha ona alokasaun verba tinan oin, nune’e proposta ne’e proponente sira retira.
Maski nune’e, proponente sira kontinua sujere mellora atendimentu pasaporte ba sidadaun sira no tau atensaun blanku billete identidade ne’ebé laiha.
Proposta OJE 2026 MJ ho montante $14.127.131 hodi aloka ba saláriu no vensimentu $7.707.129, bens no serbisu $5.604.415, kapitál menór rihun $350, no kapitál dezenvolvimentu $465.587.
Notísia relevante: Orsamentu millaun $14.127 ba Ministériu Justisa aprovadu iha espesialidade
Jornalista: Nelson de Sousa
Editora: Maria Auxiliadora
