DILI, 17 Novembru 2025 (TATOLI)—Parlamentu Nasionál, segunda ne’e, aprova Sekretaria Estadu Kooperativa (SECoop, sigla portugés) nia orsamentu hamutuk $3.611.276 iha debate espesialidade ho votu afavór 43, kontra 38, abstensaun 22.
Husi totál orsamentu ne’e kompostu husi saláriu vensimentu $1.555.757, no bens servisu $2.055.519, ne’ebé sei fahe ba programa rua mak dezenvolvimentu rurál urbana no funsionamentu dezenvolvimentu institusionál, no husi programa rua ne’e rasik fahe ba sub-program hamutuk 16.
Enkuantu iha programa dahuluk kona-ba dezenvolvimentu rurál urbana sei prevee orsamentu hamutuk rihun $365.718 ne’ebé kompostu husi kategória bens servisu.
Iha programa daruak nian hanesan funsionamentu dezenvolvimentu institusionál prevee fundu $3.245.558, mai husi kategória saláriu vensimentu $1.555.757 no bens servisu $1.689.801.
SECoop nia atinjimentu 2025 mellora ona grupu kooperativa hamutuk 248
Sekretáriu Estadu Kooperativa, Arsénio Pereira, hateten orsamentu ne’ebé mak aloka ba SECoop iha kategoria bens servisu aumenta hodi fasilita formasaun ba grupu kooperativa sira atu iha koñesementu halo rasik produsaun ba sira-nia produtu hodi hetan rendimentu kapitál no mós halo espozisaun hodi promove produtu husi grupu kooperativa sira-nian, tamba ne’e sira la konkorda ho redusaun orsamentu se bainhira deputadu sira hakarak halo tan redusaun entaun SECoop atu implementa tan servisu saida.
“Ha’u hamutuk ho ha’u-nia ekipa sira mak hala’o servisu no benefisiáriu ne’ebé hetan husi fundu tranferénsia nian. Husi implementasaun durante ne’e hatudu iha rezultadu lubuk ida ba grupu kooperativa sira,” nia dehan.
Tanba, nia dehan, sira mellora ona grupu kooperativa hamutuk 248 iha tinan 2025 no husi populasaun ne’ebé envolve iha grupu kooperativa hamutuk 38.000 ho sira-nia akumulasaun kapitál hamutuk $20.512.442, liuhusi ramu kooperativa oioin hanesan turizmu, agrikultura, kréditu, ensinu, indústria no seluk tan.
Iha diskusaun ida-ne’e mós proponente husi opozisaun piha roposta alterasaun nú. 46 ho justifikasaun atu redús alokasaun orsamentu ba rúbrika (catring) rihun $45.315 husi alokasaun inisiál rihun $118,000.00, tanba laiha rezultadu servisu ne’ebé hatudu no defisíl ba Parlamentu Nasionál atu kontrola, maibé iha votasaun proposta alterasaun ne’e la pasa ho votu afavór 25, kontra 38 no abstensaun 2 *rua).
Jornalista : Alexandra da Costa
Editór : Cancio Ximenes
