DILI, 18 Novembru 2025 (TATOLI)–Diretór Nasionál Patrimoniu Lojístika no Infraestrutura Ministériu Juventude, Desportu, Arte no Kultura (MJDAK), Abel de Jesus Andrade, hateten konstrusaun ba kampu multifunsaun iha Taibesi ne’ebé konstrui husi empreza Rocky Construction ne’e daudaun ne’e atinje ona 60%.
Notísia Relevante: Governu kontinua konstrui kampu multifunsaun Taibesi ho prosesu foun
“Konstrusaun ba kampu multifunsaun iha Taibesi agora la’o hela, empreza konsege halo to’o ona 60%. Ita halo ona pagamentu 35% ba empreza no iha tempu besik sira sei finaliza depois mak ita halo tan pagamentu 65%,” Diretór ne’e hateten ba jornalista sira iha edifisiu MJDAK, Lecidere, tersa ne’e.
Nia dehan, totál orsamentu ba konstrusaun kampu ne’e ho montante $519.057 ne’ebé mai husi Orsamentu Jerál Estadu (OJE) 2025 ne’ebé prevee iha kapitál dezenvolvimentu.
“Servisu agora la’o hela, ita fiar katak sei finaliza iha tempu besik tuir kontratu ne’ebé iha,” Diretór ne’e hateten.
Iha sorin seluk, Diretór Administrasaun no Finansa MJDAK, Guido Monteiro, reforsa tan katak, konstrusaun ne’e halo lansamentu iha tinan 2023 husi Sekretáriu Estadu Juventude Desportu (SEJD), Abrão Nokosiku Saldanha, maibé la konsege finaliza to’o mandate ukun ramata.
Ho nune’e, nia dehan, iha Governu Konstitusionál da-sia (IX) ne’ebé lidera husi Ministru Juventude, Desportu, Arte no Kultura (MJDAK), Nelyo Isaac Sarmento, haree no halo foun hikas kontratu no loke fila-fali konkursu ba públiku to’o ikus projetu ne’e la’o fali iha tinan 2025.
“Loos duni, iha tinan 2023, empreza timoroan ida ho naran Uka Unipesoál, Lda, mak manán projetu ne’e maibé laiha kapasidade finanseiru, tékniku no buat hotu, entaun ita hapara tiha kontratu ho empreza ne’e. Entaun, Governu da-ualu (VIII) ho da-sia (IX) troka malu iha inisiu 2024 halo levantamentu foun, ikus konsege halo konstrusaun ba kampu ne’e,” nia dehan.
Iha Governu da-ualu (IX) kontratu ho osan montante rihun $300-resin, maibé ho levantamentu foun ne’ebé halo husi Governu da-sia (IX) signifika hahú konstrusaun foun no halo ajustamentu ba buat lubuk ida, ho nune’e orsamentu husi rihun $300-resin sa’e ba rihun $500-resin.
Nune’e, bainhira orsamentu ne’ebé prevee ba halo konstrusaun ne’e iha tinan 2023 la konsege konklui, entaun orsamentu rihun $300-resin ne’e hatama fila-fali ba kofre Estadu no orsamentu rihun $500-resin ne’e preve fali iha tinan 2025.
Notísia Relevante: SEJD lansa fatuk dahuluk konstrusaun kampu desportu iha Taibessi
Jornalista : Hortencio Sanchez
Editór : Cancio Ximenes
