DILI, 18 abríl 2024 (TATOLI) – Diretora Nasionál Patrimoniu Lojístika no Infraestrutura, Ministériu Juventude, Desportu, Arte no Kultura (MJDAK), Maria Luisa Monteiro, hateten, antes ne’e, Governu deside hapara ona empreza Uka Unipesoal Lda ne’ebé durante ne’e mak halo konstrusaun ba kampu multifunsaun ne’e la konsege konklui tuir kontratu ne’ebé iha. Maibé, daudaun ne’e Governu deside loke hikas prosesu foun.
“Antes ne’e Governu hapara ona kompaña Uka tanba la konsege finaliza kampu multifunsaun ne’e iha Governu anteriór nia tempu, entaun ita haree ba espasu sei luan hela. Iha tinan ida-ne’e, Governu deside tau fali orsamentu atu kontinua fali konstrusaun ho prosesu foun hotu la hanesan ona uluk,” Diretora ne’e informa ba Agência TATOLI iha edifísiu MJDAK Lecidere, kinta ne’e.
Ezekutiva ne’e dehan, parte tékniku prepara ona konseitu foun aprezenta ona ba Ministru Nelyo Isaac Sarmento no aseita ona konseitu ne’ebé iha, tama ona ba faze dezeñu hodi loke fali prosesu foun.
“Ita nafatin halao tuir dezeñu anteriór maibé só halo mudansa uitoan de’it. Entaun, tenke halo dezeñu foun fali. Kampu ne’e multifunsaun nafatin, hanesan futsál, basketból, voleiból,” nia katak.
Orsamentu foun ne’ebé Governu tau atu finaliza kampu ne’e ho montante rihun $300-resin.
Rekorda fali katak, konstrusaun ba kampu ne’e Sekretáriu Estadu Juventude Desportu (SEJD) lansa fatuk da-uluk iha loron 22 outubru tinan kotuk no agora kompleta ona tinan rua-resin maibé seidauk finaliza, tanba tuir kontratu sei finaliza iha abríl 2022, maibé la konsege.
Ho nune’e Governu liuhusi SEJD kontinua hanaruk tan kontratu fulan neen tan atu bele konklui projetu ne’e maibé nafatin la konsege.
Konstrusaun kampu multifunsaun ho objetivu atu joven-sira bele espresa talentu no prátika desportu hanesan futeból, basketból no voleiból.
Projetu ne’e ezekuta hosi kompañia Uka Unipesoál Lda, ho orsamentu $24.000-resin no durasaun fulan-neen.
Jornalista: Hortencio Sanchez
Editór: Rafael Ximenes de A. Belo
