MI haruka despaisu ba Komandu PNTL fó seguransa ba Komemorasaun tinan-50 proklasaun Independénsia
DILI, 19 Novembru 2025 (TATOLI)—Ministériu Interiór (MI) hatún ona despaisu ba Komandu Polísia Nasionál Timor-Leste (PNTL) hodi husu fó seguransa másima durante komemorasaun tinan-50 Proklamasaun Independénsia iha territóru tomak.
“Ha’u husu ona ba Komandu para fó seguransa ba komemorasaun Proklasaun Independénsia unilaterál Timor-Leste 1975 ne’ebé tinan ne’e ita sei komemora ba dala-50. Ha’u hasai ona despaisu, hein Komandu implementa de’it,” Ministru Interiór, Francisco da Costa Guterres hato’o ba jornalista sira, iha Parlamentu Nasionál, Kuarta ne’e.
Governante ne’e dehan, maski membru PNTL limitadu maibé sira sei fó seguransa ho di’ak no buat sei la’o di’ak.
“Membru limitadu sim, maibé lalika preukupa, laiha problema. Amu Papa mai de’it ita rezolve, halo nusa mak ida-ne’e ita labele rezolve,” nia akresenta.
Notísia relevante : Governu atualiza preparativu tinan 50 Proklamasaun Independénsia ba Xefe Estadu
Ministru afirma, PNTL sempre prontu atu halo misaun hodi fó seguransa ba kualker serimónia komemorasaun Estadu nian.
Nia informa, iha Dili mak sei koloka membru PNTL barak liu, “Tanba ne’e konsentra efetivu barak iha Dili kompara ho munisipiu seluk, maibé munisípiu mós sei husu ba Komandu munisípiu idak-idak atu koloka nia membru hodi reforsa seguransa ba komemorasaun ne’e.”
Ministru Interiór katak, daudaun ne’e Polísia sira menus karreta maibé sei serbisu hamutuk ho Finansa hodi apoiu ba Polísia.
“Kuandu viatura la to’o ami husu para patrimóniu Estadu bele fó lai hodi bele halo serbisu. Kuandu serbisu hotu mak sei entrega fali,” Governante ne’e tenik.
Jornalistan : Natalino Costa
Editora : Julia Chatarina
