DILI, 18 Novembru 2025 (TATOLI)-Ministru Obra Públika (MOP), Samuel Marçal, hateten projetu reabilitasaun estrada dirasaun ne’ebé implementa husi kompañia Internasionál China Civil Engineering Construction Cooperation (CCECC) hahú husi ligasaun postu-administrativu Letefoho, munisípiu Ermera ba postu-administrativu Hatubuiliku, munisípiu Ainaru atinje ona 75%.
Notísia Relevante: Banku Mundiál fó empréstimu millaun $59 ba konstrusaun estrada Glenu-Letefoho-Hatubuiliku
“Projetu ne’e, daudaun ne’e paradu tanba kondisaun klimátika husi udan nian, nune’e fó impedimentu ba kompañia sira atu aselera lalais servisu ne’e ho di’ak. Nune’e, ita fiar katak projetu ne’e bele konklui tuir kontratu ne’ebé iha,” Ministru Samuel Marçal informa iha PN, ohin.
Governante ne’e hateten, projetu ne’e hetan finansia husi fundu impréstimu husi Banku Mundiál ho montante $25.540.405.33, ne’ebé sei implementa durante tinan rua (2) ho distánsia kilómetru 18.
MOP-ADN destaka ekipa tékniku halo monitorizasaun garante kualidade
Governante ne’e relata, kontrolu kualidade ba obra servisu projetu sira-ne’e iha servisu integradu entre konsultan husi Ministériu Obra Públika nomós tékniku husi Ajénsia Dezenvolvimentu Nasionál (ADN) ne’ebé sempre halo monitorizasaun hodi garante kualidade ba projetu sira-ne’ebé implementa husi Governu.
“Hanesan ita boot sira akompaña projetu barak mak ekipa téknika sira sobu ne’e tanba obra ne’e la kualidade no implementa latuir padraun ne’ebé iha. Nune’e, ita sobu hotu hafoin haruka fali kompañia implementa tuir padraun loloos iha dezenu viabilidade,” nia esplika.
Aleinde ne’e, nia dehan, kona-ba lansa projetu bara-barak maibé seidauk implementa ne’e tanba lansa ohin ne’e la’ós implementa kedas agora, maibé presiza tempu tanba kompañia sei mobiliza sira-nia ekipamentu hodi hala’o servisu.
Preokupasaun kona-ba Estrada dirasaun letefoho ba Hatubuiliku ne’e levanta husi Deputadu bankada CNRT, Oscar de Araújo, hodi husu Ministru Obra Públiku kona-ba projetu reabilitasaun estrada husi Letefoho ba Hatubuiliku ne’e la’o oinsá ona.
“Ha’u rona katak projetu ne’e daudaun ne’e paradu hela, ne’e tanbasá karik tanba povu mós envolve iha festa demokrasia ita-nia, nune’e sira presiza asesu buat ne’ebé sai hanesan sira-nia nesesidade,” nia dehan.
Jornalista : Alexandra da Costa
Editór : Cancio Ximenes
