SETP rekolla reseita millaun $5.8 husi arrendamentu rai iha tinan ne’e
DILI, 18 Novembru 2026 (TATOLI)-Sekretaria Estadu Terra no Propriedade (SETP) dezde Janeiru 2025 arrekada reseita millaun $5.806.144, ba kofre Estadu, liuhusi arrendamentu ba rai.
Sekretáriu Estadu tutela, Jaime Xavier Lopes, relata katak dezde implementa arrendamentu ba rai, to’o tinan 2025, SETP rekolla ona reseita ho totál hamutuk $70.139.931
Nia dehan, iha tinan 2012-2019, Governu halo akordu ho empreza portugeza no timoroan ida hodi halo levantamentu ba rai iha territóriu, liuhusi Sistema Nasionál Kadástru (SNC, sigla portugés) no konsege hala’o hotu hodi finaliza mapa ne’ebé balun iha disputa no balun laiha.
Ba sira ne’ebé disputa daudaun prosesu hela no ida la disputa SETP tun bá terrenu hodi halo levantamentu tékniku ne’ebé hahú husi Lautein, Baukau, Manatutu, Vikeke, hafoin bá iha Aileu, Manufahi, Ainaru, Covalima, Ermera, Likísia, Bobonaru, Oekusi no ikus iha Dili.
“Tanba Dili ne’e seidauk hetan no halo publikasaun mapa. Ami mós hanoin hela serbisu saida mak halo, tanba rai ne’e bazeia ba investimentu tenke iha faktu dokumentu”, nia hato’o.
SETP mós kontinua halo sensibilizasaun lei rai nian ba komunidade. Halo mós vizita serbisu bá Lizboa, Portugál, atu foti dokumentu sira ne’ebé komprova tempu koloniál, nune’e fó sertifikadu atribuisaun rai ne’ebé daudaun nia prosesu la’o hela.
Notísia relevante: https://tatoli.tl/2025/11/06/mj-atribui-ona-sertifikadu-rai-ba-parsela-103/
Jornalista: Nelson de Sousa
Editora: Maria Auxiliadora
