DILI, 18 Novembru 2025 (TATOLI)–Tribunál Judisiál Primeira Instánsia Dili (TJPID), Tersa ne’e, liuhusi leitura akordaun, deside aplika pena multa ba arguidu na’in-tolu, José dos Santos Naimori Bukar, Armanda Berta dos Santos no Mário do Rosário Mesquita, ba utilizasaun sala osan subvensaun partidu Kmanek Haburas Unidade Nasionál Timoroan (KHUNTO) iha tinan 2023.
Iha akordaun Tribunál, deside katak hosi arguidu na’in-tolu, ema ida selu osan ho montante $1.500 inklui koima $50, hahú husi desizaun Tribunál fó sai to’o desizaun tránzitu ein-julgadu.
Defeza arguidu na’in-tolu Ismael Assunção Lopes deklara katak desizaun Tribunál nian di’ak no defeza sei la halo rekursu.
“Desizaun ida ohin, hanesan desizaun ida-ne’ebé di’ak ba ami-nia kliente sira tanba ho pena multa hanesan atu guarda katak tanba sira hanesan lideransa polítika uza osan subvensaun partidu ho responsabilidade,” Ismael Assunção Lopes hato’o ba Jornalista sira, hafoin desizaun Tribunál, iha Kaikoli.
Notísia relevante : MP husu Tribunál aplika pena multa ba Naimori no arguidu na’in-rua seluk
Defeza rasik aseita ho Tribunál nia desizaun no sei la halo rekursu hasoru desizaun ne’e.
“Iha desizaun Tribunál nian, ikus aplika pena multa ba arguidu na’in-tolu, kada ema $1.500 ho koima $50,” nia akresenta.
Osan sira hosi arguidu sira sei mai devolve iha Tribunál kuandu desizaun tránzitu ein-julgadu.
“Tuir akuzaun Ministériu Públiku nian katak osan subvensaun partidu nian ne’ebé KHUNTO utiliza sala hamutuk $62.000. Molok ne’e arguidu sira rasik ho nia fé konsege devolve fali $8.000,” nia tenik.
Audiénsia julgamentu ne’e prezide hosi Juíz Singulár Jumiati Freitas, Ministériu Públiku reprezenta hosi Prokuradór Rafael Gusmão, arguidu na’in-tolu hetan asisténsia legál hosi Advogadu Privadu Ismael Assunção Lopes no Agustinho de Jesus.
Jornalista : Natalino Costa
Editora : Julia Chatarina
