VIKEKE, 19 Novembru 2025 (TATOLI)—Diretór Diresun Nasionál Transporte Terrestre (DNTT) Munisípiu Vikeke, Saul Henrique relata hahú fulan-Janeiru to’o Outubru 2025 ne’e DNTT Vikeke rekolla ona taxa rodoviária hamutuk $105.216,50 ba kofre Estadu.
“Reseita hirak-ne’e ami rekolla husi inspesaun ba motorizada no karreta, ba transporte públiku mak lisensa tránzitu, karta kondusaun foun no renova,” Saul Henrique dehan ba jornalista sira iha ninia kna’ar fatin, Beloi, Vikeke, Kuarta ne’e.
Nia dehan, transporte públiku (bus) ne’ebé rejista lisensa iha DNTT Vikeke hamutuk 15, enkuantu bus sira-ne’ebé rejista lisensa husi Dili hamutuk 30-resin.
“Transporte (mikrolete) ita iha rua. Ida mak halo operasaun, ida seluk la halo operasaun. Transporte públika (anguna) ne’ebé tula pasajeiru hamutuk 145 ne’ebé hala’o movimentu ba postu no munisípiu hanesan rota Lakluta, Ossú, Uatukarbau, Uatulari no Vikeke Vila. Transporte sira-ne’e ami seidauk define loloos kada postu ne’e anguna hira, maibé bá-oin ami sei define,” nia relata.
Nune’e, nia dehan, bainhira define, sei limita anguna ba kada postu tanba transporte barak liu.
“Ba futuru ami sei haree mós transporte sira-ne’e hodi minimiza. Ami sei halo peskiza ba transporte públiku ba kada postu sira, molok ita foti desizaun,” Saul informa.
Tuir dadus, reseita kada trimestre mak hanesan iha trimestre dahuluk $33.762, trimestre daruak $25.426, trimestre datoluk $35.381,50 no fulan-Outubru hamutuk $10.647.
Jornalista: Vitorino Lopes da Costa
Editór: Xisto Freitas da Piedade
