BOBONARU, 19 Novembru 2025 (TATOLI) – Diresaun Servisu Munisipál Protesaun Sivíl no Risku ba Jestaun Dezastre, Autoridade Munisípiu Bobonaru, no Autoridade Protesaun Sivíl (APC, sigla portugés) delegasaun territoriál Bobonaru, entrega pakote emerjénsia ne’ebé kompostu husi ai-han no la’ós ai-han ba vítima inundasaun na’in-75, iha aldeia Miguir, suku Aidaba Leten, postu administrativu Atabae.
Inudusaun ne’e akontese hafoin udan-boot ne’ebé tau iha segunda-feira (18/11/2025), pur volta tuku 14:00 resin.
“Ami-nia ekipa ohin dadeer mak halo levantamentu dadus ba totál família 18 mak afetada. Agora, ami mai ne’e atu atende ida emerjénsia nian de’it hanesan han, hemu nian para tulun ita-boot sira responde ba nesesidade loron ida ka rua nian. Ba uma ne’ebé estraga, ekipa sei verifika, kuandu identifika estragu entaun sei hetan apoia rekuperasaun”, Sekretáriu Autoridade Munisípiu Bobonaru ba Asuntu Sosiál. Julio Carvalho Caero, informa molok entrega apoia ba komunidade afetada sira.
Administradór Postu Administrativu Atabae, Pedro Laco Buti, reprezenta vítima afetada agradese ba Autoridade Bobonaru no APC, tanba bele responde ona pedidu ne’ebé líder komunitáriu sira hato’o.
“Ida-ne’e nesesáriu duni. Ita apoiu emerjénsia ba inan-aman sira ne’ebé afetadu husi dezastre ne’e. Akontesimentu ida horisehik ita hotu la espera, la’ós ita mak hakarak hatuur sasán sira tuir ita-nian hakarak. Natureza ne’e mak ita tenke simu ho kondisaun saida de’it”, nia realsa.
Daudaun ne’e, vítima afetada sira balu kontinua hela iha uma no seluk nia sasán muda ba família iha fatin seluk ne’ebé seguru.
Notísia relevante: Komunidade uma-kain neen iha Bobokase sofre inundasaun
Jornalista: Sérgio da Cruz
Editora: Maria Auxiliadora
