Komunidade uma-kain neen iha Bobokase sofre inundasaun
OEKUSI, 10 Fevereiru 2025 (TATOLI) – Udan-boot ne’ebé akontese iha loron sesta to’o sábadu, semana kotuk, rezulta komunidade uma-kain neen iha Bairru Nusla’o, suku Bobokase, sub-rejiaun Pante Makasar, Rejiaun Administrativa Espesiál Oekusi Ambeno (RAEOA) sofre inundasaun.
Xefe Bairru Nusla’o, Daniel da Costa, relata komunidade uma-kain neen sofre inundasaun tanba barajen iha mota Tono mak nakonu ona ho sedimentasaun, nune’e tempu udan no mota tuun bee halai la tuir nia dalan.
Notísia relevante:Inundasaun iha Bobokase, Autoridade RAEOA sei hadi’a barajen Tono
“Kada tinan ami sempre sofre inundasaun, nune’e ami husu Governu atu hadi’a barajen Tono. Tanba problema ne’e desde barajen ne’e hamri’ik kada tinan ami ofre ba inundasaun,” Xefe Aldeia ne’e dehan iha sede Suku Bobokase, ohin.
Iha fatin hanesan, Abitante afetada, Jacinta Soares rekomenda ba governu atu hadi’a barajen, liuliu aumenta gabiun, tanba antes ne’e autoridade harii ona, maibe ladun aas, nune’e mota tuun bee halai tuir estrada to’o tama komunidade nia uma.
Notísia relevante:MAPPF sei koordena ho empreza ne’ebé uluk konstrui barrajen Tono
“Ami-nia ezijénsia mak aumenta gabiun no hasai sedimentasaun iha mota Tono tanba kuandu tempu udan no mota tuun ami sempre hetan inundasaun”, nia husu.
Nune’e, Abitante Domingos Neno, informa kuandu iha tempu kalan mak udan-bo’ot abitante sira toba la hakmatek tanba tauk.
“Foin daudaun husi Governu mai dehan tenke husik fatin, maibé ami hela iha ne’e ita seidauk ukun-aan. Tuir loloos harii barajen ne’e la’os ami husik fatin ne’e”, nia lamenta.
Autoridade RAEOA prevee osan hadi’a barrajen Tono
Hataan ba kestaun ne’e, Sekretária Rejionál ba Asuntu Agrikultura, Filomena Sila, hateten katak antes ne’e Autoridade prevee ona osan iha Orsamentu Jerál Estadu (OJE) 2025 atu halo manutensaun iha tinan ne’e.
“Manutensaun ba barajen Tono, nune’e ha’u prepara ona pedidu atu hatama ba Prezidente Autoridade RAEOA, kona-ba atu hasa’e sedimentasaun ne’ebé iha barajen laran. Tanba husi Gabinete Prezidente mós prevee ona osan ba tinan 2025 hamutuk rihun $500 atu halo manutensaun, ne’ebé kalendáriu ita sei hala’o iha fulan Abril to’o Maiu,” nia promete.
Notísia relevante:Autoridade RAEOA sei halo manutensaun ba barrajen Tono
Jornalista: Abílio Elo Nini
Editor: Florencio Miranda Ximenes
