MAPPF sei koordena ho empreza ne’ebé uluk konstrui barrajen Tono
OÉ-CUSSE, 04 abríl 2024 (TATOLI) – Ministériu Agrikultura, Pekuária, Peska no Floresta (MAPPF) liuhosi Sekretáriu Estadu Pekuária, José Vieira de Araújo, kinta ne’e observa direita irigasaun Tono iha suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Hafoin vizita, Sekretáriu Estadu Pekuária, ba jornalista sira hateten, Governu sei koordena fali kompañia internasionál Young-jing hosi nasaun Korea Súl, ne’ebé uluk konstrui barrajen Tono, nune’e bele buka solusaun ba problema barrajen ne’e.
Notísia relevante: PA RAEOA sei orienta IGE normaliza impaktu inundasaun iha suku Bobokase
Sekretáriu Estadu Pekuária ne’e hateten, vizita ofisiál ne’e nu’udar orientasaun hosi Ministru Agrikultura, Peska, Pekuaria, atu observa servisu agrikultura iha Oé-Cusse.
“Ohin ita haree irrigasaun ne’e rasik ferramente nian kauza hosi sedimentasaun no mota boot lori tahu no fo’er barak, afeta ba sistema odamatan fahe bee ba natar sira kuaze aat ona, tan ne’e objetivu hosi vizita ida-ne’e, atu haree di’ak liután, servisu sira iha terrenu, hosi buat-ne’ebé maka ita haree ba futuru, ita moos sei halo liña koordenasaun ho kompañia ne’ebé uluk mai kaer projetu ne’e,” José Vieira de Araújo hateten.
Nia hateten, Governu presiza koordena fali kompañia ne’ebé uluk konstrui irrigasaun Tono, nune’e Ministériu Agrikultura, Pekuária no Peska, sei servisu hamutuk ho Autoridade RAEOA, molok hadi’a fali irrigasaun ne’e.
“Ita koordena fali kompañia atu haree ekipamentu sira-ne’ebé uluk uza atu konstrui irrigasaun atu buka nia orijen, nune’e ita labele inventa tún sa’e de’it, ba futuru bele aat fila-fali, ita mós sei servisu hamutuk ho parte Autoridade RAEOA liuhosi servisu agrikultura, oinsá bele haree sistema irrigasaun ida-ne’e,” nia katak.
Notísia relevante: Rezultadu kolleta natar Petun Oé-Cusse menus
Iha fatin hanesan, Diretór Servisu Agarikultura RAEOA, Amaro Efi, agradese ba prezsensa hosi MAPPF, nune’e bele observa direita nu’udar planu ida ba futuru bele fó solusaun.
“Daudaun ne’e ita simu ona orientasaun hosi Prezidente Autoridade mai iha Sekretáriu Rejionál Agrikultura, mai halo identifikasaun, atubele redús sedimentasaun ida-ne’e, maibé ida-ne’e ita kanaliza ona ba iha nível kompeténsia tanba ami hanesan tékniku simu de’it orientasaun, ba futuru atu halo manutensaun,” nia katak.
Purtantu, antes ne’e Prezidente Autoridade RAEOA, Rogério Tiago Lobato, akompañia hosi Coordenadór ZEEDOA, João Mendes Gonçalves, observa ona, no promete iha futuru atu halo manutensaun.
Notísia relevante:Autoridade RAEOA sei halo manutensaun ba barrajen Tono
Entretantu, barrajén Tono benefísia natar ektare 1.717 hodi responde ba família uma-kain kuaze 100 maka asesu, no bee dadoras rua, boot nia naruk kilómetru 26,5 no ida ki’ik nia naruk metru 2,6.
Barrajen Tono hahú funsiona dezde 2016 iha mandatu Prezidente Autoridade RAEOA, Mari Alkatiri, no konstrusaun ne’e konstrui ho orsamentu millaun $11,5, ezekuta hosi kompañia internasionál Young-jing hosi Korea Súl.
Jornalista: Abílio Elo Nini
Editór: Evaristo Soares Martins
