OÉ-CUSSE, 12 marsu 2024 (TATOLI) – Prezidente Autoridade RAEOA, Rogério Tiago Lobato, sei orienta ekipa Institutu Jestaun Ekipamentu, Institutu Públiku (IGE,IP, sigla portugés) atu halo normalizasaun ba impaktu inundasaun ne’ebé akontese iha suku Bobokase, sub-rejiaun Pante Makasar.
Notísia relevante: Komunidade Bobokase husu autoridade RAEOA buka solusaun ba inundasaun
Entretantu, akontesimentu inundasaun ne’e iha loron-segunda 11 marsu, ne’e komunidade sira iha suku Bobokase, enfrenta inundasaun tanba dezastre naturál, akontese udan boot akompaña ho anin, nune’e afeta natar, to’os inklui uma hela fatin hetan estragu.
“Ha’u simu ona informasaun ne’e, ha’u sei haruka Diresaun Rejionál Infraestrutura, atu ba halo levantamentu lalais, nune’e bele dezloka ekipa IGE ba halo intervensaun, hadi’a fatin sira-ne’ebé hetan estragu no família afetadu presiza rekupera,” Rogério Lobato hateten, iha Oé-Cusse, tersa ne’e.
Prezidente Autoridade RAEOA, fundamenta, barrajen Tono sei iha problema boot, dezde Autoridade sesante konstrui iha tinan 2017 liubá, kada tinan fó impaktu negativu, tanba estraga komunidade nia to’os, natar inklui uma hela fatin.
“Foin daudaun ita ba halo vizita iha ne’ebá, haree atu oinsá iha futuru bele hadi’a, tanba sira halo barrajen ne’e iha rai tetuk, entaun rai henek mak nakonu, dalaruma bee-mota tún mai taka, barrajen afeta ba komunidade sira-ne’ebé hela besik.”
Nia informa, funsionamentu barrajen Tono, iha parte seluk fó benefísiu ba iha fatin balu hanesan, iha Padiae iha suku Cunha no Lalisuk bee komesa tama ona, maibé tanba natureza, dalaruma nia halo di’ak iha fatin ida maibé iha fatin seluk halo estragu.
Notísia relevante:Autoridade RAEOA sei halo manutensaun ba barrajen Tono
Entretantu, Agência Tatoli observa, iha segunda 11 marsu ne’e, Asesór ba Asuntu Sosiál, Agostinho Caet, hamutuk ho Autoridade Protesaun Sivíl (APC, sigla portugés), hahú halo levantamentu dadus, nune’e bele hetan rekuperasaun liuhosi apoia emerjénsia.
Jornalista: Abílio Elo Nini
Editór: Evaristo Soares Martins
