OEKUSI, 19 Novembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Aprovizionamentu (DRPA), kuarta ne’e, fó sai informasaun ho kategória anúnsia konkursu públiku ba empreza lokál no nasionál sira atu asesu ka foti dokumentu hodi konkorre ba projetu ho deskrisaun konstrusaun no edifísiu ba Masakre Tumin ne’ebé lokaliza iha suku Bobometo sub-rejiaun Oésilo.
Dokumentu ofisiál anúnsia konkursu públiku ne’ebé Ajénsia Tatoli,I.P asesu ho númeru tenderizasaun, 181/DA/DRPA/RAEOA-TL/XI/2025, hodi fó oportunidade ba empreza sira ba data submisaun dokumentu durante loron hitu, hahú husi 19 Novembru to’o 26 Novembru 2025.
Notísia relevante:Ponte alternativa konstrui iha semitériu Masakre Tumin konkluídu
Antes ne’e, Prezidente Autoridade RAEOA, Régio da Cruz Salu, Régio Salu, hato’o nia promesa iha komemorasaun loron Makasakre Tumin, iha tersa-feira 09 Setembru 2025, hamutuk ho família sobrevivente hala’o ho misa no kari ai-funan, ba dala-26, ne’ebé akontese iha loron 08 to’o 09 Setembru 1999.
“Ordén husi Primeiru-Ministru, ita sei kombina fatin Masakre Tumin ne’e, atu harii sentru reflesaun istória luta ba libertasaun nasionál,” nia haktuir iha momentu ne’ebá.
Nia informa katak, iha mandantu Eis-Prezidente Autoridade,Rogério Lobato, promete ona ba povu Oekusi liuliu povu Bobometo ho verba ida atu hahú dezenvolvimentu sentru reflesaun ne’e, no sei aloka rihun $100, faz parte enkuadramentu tomak atu halo inisiativa ne’e hahú.
“Ha’u husu eis-diretór finansa, katak verba ne’e deklarasaun polítiku ka ou teknikamente faz parte iha planu ezekusaun orsamentu, entaun tenke haree tuir paresér jurídiku ita asina hahú implementa, maibé la’ós projetu, ne’e investimentu ba sentru reflesaun ida-ne’ebé atraídu ba poténsia turizmu istóriku Oekusi nian,” nia afirma.
Notísia relevante:Autoridade sei moderniza Masakre Tumin nu’udar sentru reflesaun ba istória luta
Autoridade ne’e informa, maske mandatu fulan tolu de’it hodi lidera RAEOA hahú husi 01 Setembru termina iha loron 30 Novembru 2025, maibé inisiativa ne’ebé Autoridade sesante husik hela, tenke kontinua.
“Projetu dezenvolvimentu ida-ne’e, maske ha’u-nia mandatu fulan tolu de’it, maibé tenke hahú, sei transforma lala’ok akontesimentu sekuensiál, ita-nia lia-na’in Bobometo ho naran Vitór Noni (Bob-Noni), nia mate ho kilat musan iha 08 Setembru, mate uza roupa saida, iha ne’ebé hamrik iha ai-hun ka uma ka ou iha estrada-ninin, ita sei hahú, ne’e mak segmentu sekuénsiál,” nia promete.
Tuir nia, bainhira tranforma fatin sagradu ne’e, Autoridade mós sei kontrui monumentu ida, hodi refleta karatér akontesimentu sekuensiál.
“Ha’u rasik krítika verba rihun $100 ne’e bele halo ona, maibé rejeita ita tenke foku ba de’it monumentu, pomove rekoñese no prezerva, sekuensiál tomak atu ema koñese ita-nia luta, ita sei mate mohu ona, labarik sira tenke hatene nafatin, ha’u-nia aman no avó sira-nia luta ba rai ne’e atu hetan independénsia, ita sei halo miniatura ida vivu, ne’ebé sei refleta hatudu iha estatua ida ho karatér akontesimentu sekuensiál, ne’e la’ós projetu maibé investimentu prezervasaun patrimóniu importante ba povu Oekusi no povu Timor-Leste ba luta libertasaun nasionál, bainhira mai vizita, bele hetan inspiradu husi fatin ne’e,” nia hateten.
Notísia relevante:Presiza harii ponte hodi fasilita movimentasaun bá semitériu masakre Bobo-Ufe Tumin
Jornalista: Abílio Elo Nini
Editór: Rafael Ximenes de A. Belo
