OEKUSI, 20 Novembru 2025 (TATOLI) – Vendedór balun iha Rejiaun Administrativa Espesiál Oekusi Ambeno (RAEOA), preokupa tanba hafoin ekipa konjunta muda sira husi merkadu Numbei tuan ba merkadu provizóriu iha bairru Masin-Kliko, la hetan fatin atu kontinua fa’an fali sira-nia sasán.
Notísia relevante:Merkadu Numbei sei konstrui ho verba rihun $76, aterru hahú daudaun ona
Vendedora Terezia Falo husi aldeia Fatubija’e suku Bobokase, lamenta, tanba antes ne’e, nu’udar fa’an-na’in iha merkadu tradisionál Numbei, maibé hafoin komisaun sira muda ba provizória la konsege hetan ona. Tan ne’e, nia rekomenda ba komisaun konjunta atu trata ema hotu tenke hanesan.
“Ami lori sasán barak, hanesan modo, ai-fuan bua-malus, sukaer, ai-farina no seluktan, kuandu fa’an la hotu dalaruma ami kontinua toba kalan ida, hanesan uluk sei iha merkadu tuan, maibé ohin ami mai la hetan ona fatin, agora tempu udan ami tenke iha fatin, tanba ami lori kedas lona. Ami agora sei uza de’it ai-mahon sira iha dalan-ninin hodi kontinua fa’an sasán. Ami espera komisaun labele hanesan ne’e, trata fa’an na’in-sira tenke hanesan, labele ami mai ikus la hetan fatin, husik de’it ami hanesan ne’e, ami nu’udar agrikultór, ami-nia moris mak liuhosi fa’an sasán de’it,” nia hateten.
Catarina Caet husi Suku Costa, vendedora ida mós, orgullu tanba fatin luan kompara ho merkadu tuan. “mMibé triste tanba maluk barak mak hetan fatin, entaun komisaun tenke jere didi’ak fatin ne’e, tanba balun ema ida de’it maibé okupa ema na’in-rua nian, entaun ida-ne’e la justu, Governu tenke trata ema hotu hanesan, tanba ami ne’e la’ós foin fa’an iha merkadu ne’e, ami faan nanis ona,” nia rekomenda.
Notísia relevante:Uma-kain haat iha merkadu Numbei rejeita hamamuk fatin tanba rai privadu
Hatan ba preokupasaun ne’e, Xefe Departamentu Komérsiu Oekusi, Crisencio Susu, rekoñese, nune’e ekipa konjunta sei esforsa atu jere nune’e ema hotu bele asesu hodi fa’an ho seguru.
“Sira-ne’ebé la hetan fatin atu fa’an, tanba kuaze loron haat ona, ami sukat fatin ne’e fahe, balun la partisipa, entaun komisaun labele hein, tanba iha fatin ne’e ema barak nian, entaun ita labele hein bainhira mak sira mai, tanba iha merkadu tuan ema komesa sobu daudaun ona, entaun ita labele hein sira, tan ne’e ohin sira-ne’ebé mai ikus pasiénsia, maibé ami sei esforsu atu identifika fatin balun iha ne’e, atu jere halo didi’ak para ema hotu asesu hodi fa’an sira-nia sasán ho di’ak,” nia informa.
Notísia relevante:Abitante 156 iha merkadu Numbei koopera ho Governu sobu rasik uma-kioske
Jornalista: Abílio Elo Nini
Editór: Rafael Ximenes de A. Belo
