Zé Pedro aprezenta razaun rua Timor-Leste falla iha jogu kualifikasaun AFC Asian Cup
DILI, 20 Novembru 2025 (TATOLI)—Treinadór Prinsipál Selesaun Nasionál Timor-Leste, Zé Pedro aprezenta razaun rua hanesan limitasaun tempu no kondisaun mínima sai fatór determinasaun ba ekipa nasionál falla iha faze kualifikasaun Grupu A AFC Asian Cup 2027.
Zé Pedro esplika bainhira simu responsabilidade nu’udár treinadór prinsipál husi Federasaun Futeból Timor-Leste (FFTL), nia parte uza tempu ne’ebé limitadu fulan-rua hodi halo preparasaun ba ekipa nasionál hanesan selesaun ba jogadór inklui hala’o treinu maibé jogadór sira-ne’e maioria deskansa hafoin kompetisaun doméstika ramata, entaun afeta ba kualidade ekipa.
“Jogu sira-ne’e la fásil. Realidade mak ita-nia kondisaun seidauk sufisiente atu kompete liuliu nasaun forte rua hanesan Filipina no Tazaskistaun,” Zé Pedro hateten iha sala imprensa FFTL, Bairros dos Grilos, Kinta ne’e.
Fatór seluk, nia hatutan, ekipa nasionál hanesan Tazaskistaun no Filipina ne’ebé konsideradu preparadu di’ak no iha kondisaun ne’ebé apoia liuliu kualidade jogadór bainhira kompara ho Gali Cs.
Maski nune’e, nia tenik, ekipa treinadór sempre esforsu hodi hala’o selesaun ba jogadór ne’ebé konsideradu di’ak hodi enfrenta jogu tolu kontra Filipina dala-rua no Tazaskistaun.
Notísia relevante: Timor-Leste derrota ho Tazaskistaun 0-5
“Futuru ita sei mellora di’ak liután liuliu kompetisaun rai-laran tenki tuir órariu,” Zé Pedro promete.
Ekipa selesaun nasionál Timor-Leste rasik falla hakat ba kompetisaun Asian Cup tinan-2027 ne’ebé sei realiza iha Arábia Saudita tanba durante jogu kualifikaaaun faze grupu rekolla pontu tolu de’it, rezultadu manán ida (1) no derrota haat (4) husi jogu lima (5).
Jogu lima ne’ebé ekipa Lafaek hala’o, manán Maldiva ho skor 1-0. Entretantu, jogu haat ne’e derrota daruak kontra Tazaskistaun ho skor 1-0 no 0-5, inklui derrota tan daruak kontra Filipina ho skor 3-1 bainhira Timor-Leste sai uma-na’in no lakon 1-4 bainhira joga ho ekipa Filipina iha Manila-Filipina.
Nune’e, Timor-Leste klasifikadu iha pozisaun datoluk, Tazaskistaun okupa iha pozisaun dahuluk ho pontu 13 hafoin manán haat (4) no impata ida (1), Filipina iha pozisaun daruak ho pontu 13, rezultadu manán haat (4) no impata ida (1), enkuantu Maldiva iha pozisaun ikus ho pontu 0 hafoin derrota jogu lima (5).
Entretantu, mezmu la klasifikadu iha kompetisaun faze kualifikasaun Grupu A, Timor-Leste sei hala’o tan jogu ida kontra Maldiva ne’ebé tuir kalendáriu sei realiza iha 31 Marsu 2026.
Jornalista: Natalino Belo
Editór: Xisto Freitas da Piedade
