DILI, 21 Novembru 2025 (TATOLI)-Governu liuhusi Primeiru-Ministru, Xanana Gusmão, lori Governu nia naran hato’o agradesementu ba hanoin konstrutivu no krítika husi Parlamentu Nasionál liuhusi deputadu sira-nia hanoin durante debate orsamentál, no kompremetidu sei implementa servisu tuir proposta ne’ebé define iha Orsamentu Jerál Estadu (OJE) 2026.
Primeiru-Ministru, Xanana Gusmão, hateten hanoin konstrutivu tebes la’ós mai rona de’it no halo komparasaun ba implementasaun servisu sé mak di’ak-liu, maibé mai atu hato’o krítika ne’ebé konstrutivu atu Governu bele kontinua buka hadi’a nafatin maneira kaer ukun.
“Tanba ne’e mak ami agradese tebe-tebes ba vontade ne’ebé hatudu iha loron hirak ne’e husi bankada opozisaun no bankada Governu. Krítika hirak ne’e, ami simu ho laran tanba iha hotu-hotu nia misaun. Ita-boot sira reprezenta povu no ami buka atu serní povu ida-ne’e,” Primeiru-Ministru hato’o hafoin ramata debate OJE 2026 iha PN, ohin.
Xefe Governu ne’e hateten, maske Governu laiha kbiit atu halo servisu ho lalais no di’ak liután maibé tanba liu tiha ona no asuntu ne’ebé deputadu sira halo intervensaun ba Governu atu haka’as-an liután ne’e importante mak kompromisu husi Governu atu halakon buat hotu ne’ebé ladun di’ak no serve ba Estadu.
Governu lakohi deklara katak di’ak-liu sé-sé de’it, maibé buka aprende nafatin iha sistema ne’ebé demokrásia iha Timro-Leste mak hanorin daudaun ona, ne’e duni agradese tebe-tebes ba apoiu tomak hodi bele hetan Orsamentu Jerál Estadu 2026.
“Ami bele promete de’it katak, ami sei hatudu ami-nia kumpromisu tomak ba hadi’a, kurije no implementa saida mak ami husu tuir orsamentu OJE nian, servisu ho responsabilidade, efisiénsia no ami mós abertu ba deputadu sira-nia fiskalizasaun,” nia dehan.
Jornalista : Alexandra da Costa
Editór : Cancio Ximenes
