DILI, 21 Novembru 2025 (TATOLI)—Ekipa Maranatha Football Club kontinua gaña pontu tolu iha jornada dalimak primeira divizaun Liga Futeból Femininu Timor-Leste (LFFTL) hafoin halakon Na’in-Feto FC iha Estádiu Munisipál Dili, Kinta (20/11/2025).
Hafoin reforsa husi jogadora estranjeira, ekipa ne’ebé lideradu husi treinadór José Fernandito konsege halakon Na’in-Feto FC ho skor bo’ot 11-0, iha-ne’ebé parte dahuluk ramata ho skor 5-0 ne’ebé prodús husi jogadora sira hanesan Eugenia Lopes iha minutu 1 no 19, Agia 34 no 45+1 no Nafarina iha minutu 35.
Notísia relevante: Jogadora estranjeira husi Indonézia reforsa ona Maranatha FC
Parte daruak, Maranatha ne’ebé kompromete hakarak sai kampiaun iha LFFTL kontinua aumenta golu neen ne’ebé enxe liuhosi jogadora hanesan Ratri Titania iha minutu 58 no 61, Eugenia Lopes aumenta tan golu rua iha minutu 68 no 70, Nofa 77 no Rosalina Wenda taka tabela skor 11-0 iha minutu 82.
Ho rezultadu jogu entre ekipa rua, Maranatha rekolla pontu ualu (8) no iha pozisaun dalimak, rezultadu husi manán rua (2) no impata rua (2), derrota ida (1), enkuantu Na’in-Feto FC kontinua iha zona mean hodi mantein pozisaun dasiak hafoin derrota lima (5).
Jornalista: Natalino Belo
Editór: Xisto Freitas da Piedade
