Jogadora estranjeira husi Indonézia reforsa ona Maranatha FC
DILI, 14 Novembru 2025 (TATOLI)–Jogadora estranjeira hamutuk na’in-haat reforsa ona ekipa Maranatha Football Club iha kompetisaun primeira divizaun Liga Futeból Femininu Timor-Leste (LFFTL).
Treinadór Maranatha FC, José Fernandito haktuir jogadora hirak-ne’e reforsa Maranatha hafoin kompetisaun hakaat bá jornada datoluk hanesan iha liña guarda rede, defeza, média no avansada.
“Ha’u atu hatete de’it jogu sira tuirmai inklui volta daruak ami sei di’ak liután,” Treinadór Maranatha infroma ba TATOLI iha Estádiu Munisipál Dili, Sesta ne’e.
Jogadora hirak-ne’e hanesan Deska nu’udár Guarda rede, defeza Dito, Nafa nu’udar média no avansada ho naran Nofa ne’ebé motiva ona jogadora lokál sira no hahú hatudu rezultadu pozitivu.
Notísia relevante: Manán UNITAL 4-0, Maranatha sa’e ba pozisaun dalimak
Ho prezensa jogadora sira-ne’e ekipa Maranatha Football Club preparada no komprometida sei hatudu jogu hasoru ekipa forte seluk hanesan AD SLB, Maudoko, S’amuser no Buibere.
Jornalista: Natalino Belo
Editór: Xisto Freitas da Piedade
