DILI, 14 Novembru 2025 (TATOLI)—Ekipa Maranatha Football Club konsege hakat husi pozisaun dahitu ba pozisaun dalimak hafoin manán 4-0 konta UNITAL FC iha jornada dahaat primeira divizaun Liga Futeból Femininu Timor-Leste (LFFTL), iha Estádiu Munisipál Dili, Sesta ne’e.
Ekipa Maranatha ne’ebé reforsa husi jogadora estranjeiru na’in-haat konsege lori rezultadu pozitivu hafoin jogu tolu liubá rekolla de’it pontu rua no atualmente hahú hatudu rezultadu tanba konsege rekolla pontu lima hodi mantein iha pozisaun dalimak.
Notísia relevante: Maranatha FC sei evalua-aan hafoin derrota ho Buibere FC
Ekipa UNITAL mak sai vítima dahuluk ba Maranatha iha-ne’ebé rezultadu jogu hatudu jogadora estranjeira fó influénsia ho tabela skor 4-0 iha-ne’ebé parte dahuluk enxe husi jogadora Nofa Sori iha minutu 16.
Enkuantu, golu tolu seluk prodús iha parte daruak liuhosi jogadora Agia Bria liuhusi golu hattrick iha minutu 57, 68 no 72 hodi hakotu jogu entre ekipa rua ho tabela skor 4-0.
Ho rezultadu jogu entre ekipa rua, lori UNITAL FC ne’ebé antes ne’e iha pozisaun daneen tun eskada ida ba pozisaun dahitu ho pontu tolu (3) iha tabela klasifikasaun, enkuantu Maranatha FC iha pozisaun dalimak ho totál pontu lima (5).
UNITAL FC fiar aan mantein iha primeira divizaun
Maski nune’e, ekipa UNITAL Football Club fiar aan sei mantein iha kompetisaun primeira divizaun Liga Futeból Femininu Timor-Leste (LFFTL) biar to’o jornada dahaat foin rekolla pontu tolu (3).
Treinadór UNITAL FC, Abel Barbosa rekoñese mezmu jogadora iha UNITAL FC menus esperiénsia (reforsa de’it husi jogadora lokál), laiha selesaun nasionál maibé husi ekipa sanulu ne’ebé tuir kompetisaun, UNITAL FC garante sei rekolla pontu husi ekipa haat seluk hanesan Kulugisa FC, Akadémika FC, VDL no Na’in-Feto FC.
“Ha’u fiar UNITAL FC sei mantein iha primeira divizaun tanba sei hasoru ekipa lima seluk ne’ebé forsa hanesan,” Treinadór UNITAL FC informa ba TATOLI iha Estádiu Munisipál Dili.
Nia hateten ekipa seluk hanesan AD SLB, Maudoko FC, Buibere FC no Maranatha FC kategoriza ekipa forte tanba reforsa husi jogadora ne’ebé selesionada iha ekipa nasionál no rekruta tan husi estranjeiru, nune’e sira só evita atu derrota ho golu barak.
“Ekipa sira-ne’e nia nivél lahanesan ho ami tanba reforsa husi jogadora kualidade. Importante mak ami labele derrota ho golu barak,” Abel Barbosa akresenta.
Nune’e, atu garante mantein, nia parte sei evalua no kontinua treinu nune’e jogadora sira bele hasa’e kualidade jogu no rekolla pontu husi ekipa ne’ebé konsideradu iha forsa hanesan ho UNITAL FC.
Entretantu, kompetisaun to’o jornada dahaat UNITAL FC iha pozisaun dahitu iha tabela klasifikasaun LFFTL ho pontu tolu (3), rezultadu manán ida 1 no derrota haat (4).
Jornalista: Natalino Belo
Editór: Xisto Freitas da Piedade
