GINE-BISAU, 21 NOVEMBRU 2025 (TATOLI)-Ekipa Misaun Observasaun Eeitorál (MOE) g7+ no Misaun Observasaun Eleitorál Komunidade País Ko’alia Lian Portugés (CPLP, sigla portugés) realiza enkontru koordenasaun, ho objetivu atu armoniza serbisu hamutuk ne’ebé sei dezenvolve durante Eleisaun Prezidensiál no Parlamentár iha 23 Novembru iha Giné-Bisau.
Diretór Operasional g7+, Félix Piedade, subliña katak reuniaun ne’e serve prinsipalmente atu fahe informasaun entre misaun rua, revee serbisu sira ne’ebé halo ona iha terrenu no define mekanizammu kooperasaun ba loron votasaun nian.
Grupu misaun rua ne’e aprezenta relatóriu kona-ba enkontru sira ho partidu polítiku, nomós reuniaun ho Komisaun Nasionál Giné-Bisau, inklui votasaun antesipada ba militár no polísia sira.
Tuir Félix Piedade, pontu importante iha reuniaun ne’e atu asegura katak ekipa kobre rejiaun eleitorál sira hotu lahó duplikasaun no bele kompleta malu hodi fahe informasaun ba malu.
“Ita ko’alia mós kona-ba área kobertura, tanba eleisaun tinan ne’e halo iha rejiaun sia mak hanesan Biombu, Oiu, Cacheu, Bafata, Gabu, Quinara, Tombali, Bolama Bijagos, no Setór Autónomu Bisau. Koordenasaun ne’e oinsá fahe malu atu ita bele kompleta malu fahe informasaun”, Felix Piedade dehan ba Tatoli iha Otél Ceiba.
Nia esplika katak koorperasaun serbisu ne’e importante tebes tanba kada observadór nia objetivu hanesan. Nune’e, iha eleisaun jerál iha 23 Novembru ekipa rua ne’e bele kompleta malu, tanba g7+ iha ekipa tolu no CPLP iha ualu.
“Ita ko’alia kona-ba depoizde eleisaun atu aprezenta relatóriu preliminár ba CNE, entaun ita ko’alia atu halo aprezentasaun rezultadu konjunta ida. Data tentativa atu aprezenta relatoriu iha 25 Novembru 2025”, dehan.
Iha fatin hanesan, Xefe Misaun Observasaun Eleitorál CPLP, Luís Carvalho, manifesta satisfasaun tanba bele realiza enkontru koordenasaun serbisu ho g7+ liga ba prosesu eleisaun jerál no troka esperiénsia ba malu.
“Obrigada ohin ita bele hasoru malu, buat ne’ebé ita ko’alia ne’e mak oinsá troka hanoin no fahe esperiénsia ba malu kona-ba ita-nia serbisu hanesan observadór durante iha Gine”, nia subliña.
Xefe delegasaun CPLP ne’e reforsa katak nia ekipa preparadu atu serbisu hamutuk ho g7+ hodi asegura observasaun ida kompleta no rigoroza iha prosesu eleitorál.
Notísia relevante: MOE g7+ rona planu no prioridade líder partidu sira ba futuru Giné-Bisau
Jornalista: Arminda Fonseca
Editora: Maria Auxiliadora
