Tribunál aplika medida koasaun tolu ba xineza SD
DILI, 21 Novembru 2025 (TATOL)–Tribunál Judisiál Primeira Instánsia Dili (TJPID) liuhusi Juís Prosesu, José Gonçalves, Sesta ne’e, hasai despaisu hodi aplika medida koasaun tolu hanesan Termu Identidade Rezisténsia (TIR), Aprezentasaun Períodika no proibisaun auzénsia ba arguidu xineza ho inisiál SD.
Durante prosesu interrogatóriu ba kazu ne’e, Ministériu Públiku (MP) liuhusi Prokuradór João Marques promove arguidu SD ho krime arma proibida, ne’ebé previstu no punidu iha artigu 211 husi Kódigu Penál Timor-Leste.
Liuhusi prosesu interrogatoriu dahuluk, MP liuhusi Prokuradór João Marques iha nia alegasaun, husu ba Tribunál atu aplika medida Aprezentasaun Períodika, proibisaun auzénsia no medida koasaun, nune’e arguidu iha obrigasaun selu osan ho montante $10.000 ba Tribunál.
Notísia relevante : PNTL submete ona kazu sidadaun xineza SD ba Ministériu Públiku
Maibé iha prosesu ne’e, Tribunál aseita no hasai despaisu ba medida koasaun TIR, proibisaun auzénsia no medida koasaun Aprezentasaun Períodika, nune’e arguidu SD iha obrigasaun atu aprezenta-an ba Eskudra Dom Aleixo, fulan-ida dala-rua.
Iha alegsaun, Defeza husi arguidu SD, Advogadu Privadu Jerónimo Piedade da Silva, husu atu Tribunál atu absolve nia kliente husi krime ne’ebé MP promove ba nia kliente tanba iha indikasaun katak detensaun ne’ebé mak autoridade sira halo hasoru nia kliente ne’e iha irregularidade oituan.
Defeza Jerónimo Piedade da Silva fundamenta katak la konkorda ho despaisu Tribunál nian, nune’e sei halo rekursu hodi kontesta ba despaisu referida.
“Husi ami-nia parte la konkorda mas ida-ne’e mak desizaun Tribunál, ita tenke obedese maibé se ita la konkorda, ita iha via seluk. Ita bele rekorre hodi halo rekursu,” nia tenik.
Jornalista : Natalino Costa
Editora : Julia Chatarina
