Tribunál kontinua halo julgamentu ba kazu sukestru ne’ebé envolve membru F-FDTL na’in-tolu
DILI, 21 Novembru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, kontinua hala’o julgamentu ba kazu sukestru no abuzu poder, ne’ebé envolve husi arguidu na’in-tolu hanesan JXB, MdC, DNS nu’udar membru husi institusaun FALINTIL-Forsa Defeza Timor-Leste (F-FDTL) hasoru lezadu Armondo Soares, iha tinan 2022.
Iha audiénsia julgamentu ne’e, Tribunál koletivu prosede hodi kontinua rona sasin na’in-rua ba kazu ne’e.
Tribunál rona depoimentu hosi sasin Daniel, ne’ebé fó sasin katak momentu ne’ebá sasin maka kontaktu lezadu na’in-rua hodi hemu kafé iha Farol. Liu tiha minutu balun, iha ema na’in-tolu bá hodi foti lezadu, maibé sira na’in-tolu lori lezadu tún husi eskada, fatin ne’ebé sira hemu kafé no sasin haree hela, maibé kona-ba sira baku lezadu sasin la haree.
Sasin deklara, depois to’o tiha uma, sasin kontaktu ba lezadu maibé nia númeru mate.
Nune’e mós, sasin José Nunes haktuir ba Tribunál, momentu ne’ebá nia nu’udar membru Polísia Nasionál Timor-Leste (PNTL) ne’ebé asume knaar hanesan investigadór iha Kuartél Jerál PNTL.
Notísia relevante : Tribunál rona sasin ba krime sekuestru no abuzu poder
Sasin deklara, momentu ne’ebá arguidu na’in-tolu lori lezadu bá Kuartél Jerál PNTL, Departamentu Servisu Investigasaun Kriminál Nasionál hodi submete ba identifikasaun tanba deskonfia nia envolvimentu uza veteranu sira-nia naran katak, nia estatutu hanesan ho veteranu sira no simu orientasaun sai hanesan Kordenadór Servisu Orden Sekreta (SOS) hodi hala’o kobransa.
Sasin deklara tan katak, arguidu sira lori lezadu, nune’e sasin halo indentifikasaun ba lezadu durante oras 12 no sasin mesak mak halo indentifikasaun, nune’e hafoin ramata sasin liberta hotu.
Iha identifikasaun laran, sasin la haree lezadu hetan agresaun, maibé agresaun akontese iha li’ur ne’e sasin la hatene.
Sasin hateten, momentu ne’ebá sasin atu lori lezadu fila, maibé lezadu dehan nia kolega ida maka tula nia fila, tanba ne’e sasin mós haruka lezadu fila.
Arguidu na’in-tolu lori lezadu bá ho karreta, depois entrega ba sasin hodi halo indentifikasaun no lezadu la informa ba investigadór dehan arguidu sira halo agresaun ba lezadu.
Arguidu sira buka tuir lezadu, tanba vítima sira ne’ebé lezadu ba bosok hodi simu osan maka hato’o no arguidu sira buka tuir lezadu.
Hafoin Tribunál rona tiha depoimentu sasin sira, Tribunál deside marka fali ba loron seluk hodi kontinua rona tán sasin balun.
Audiénsia julgamentu ne’e prezide husi Juíz Kolektivu, Ana Paula, Ercília de Jesus, José Maria, Ministériu Públiku reprezenta husi Prokuradór Aderito Tilman, arguidu sira hetan asisténsia legál husi Defensór Públiku Sérgio Dias Quintas.
Jornalista : Natalino Costa
Editora : Julia Chatarina
