OEKUSI, 21 Novembru 2025 (TATOLI) – Vendedór sira-ne’ebé daudaun ne’e muda ona ba merkadu provizória, rekomenda ba Autoridade Rejiaun Administrativa Espesiál Oekusi Ambeno (RAEOA), hodi instala iluminasaun liña elétrika no apoia fornesimentu bee-moos ba haris fatin sira ne’ebé konstrui ona, nune’e bele kontinua fa’an sira-nia sasán iha merkadu provizóriu ne’e ho seguru.
Notísia relevante:Abitante 156 iha merkadu Numbei koopera ho Governu sobu rasik uma-kioske
Jestór Merkadu Numbei, Fernando de Souza Neca, orgullu tanba Governu fó ona solusaun ba vendedór sira iha merkadu Numbei hodi muda ba merkadu provizóriu atu kontinua fa’an sasán, maibé presiza kompleta fasilita sira hanesan bee-moos ba sanita públiku sira inklui instalasaun iluminasaun.
“Ami hela ona no faan ona iha merkadu temporáriu, ita haree sintina kompletu iha neen kedas, tanke bee-moos kompletu, maibé bee mak laiha. Ita haree vendedór barak mak konsentra iha fatin ne’e, entaun atu soe oinsá, kuandu bee laiha, tanba ne’e presiza tau bee iha tanke sira, nune’e ita bele prevene soe fo’er arbiru iha merkadu provizória ne’e, depois iha kalán sei nakukun, tanba seidauk instala ahi,” nia hateten iha merkadu provizória Numbei, ohin.
“Tanba ne’e ami husu parte EDTL no SAS atu tau matan ba problema ne’e, bele kontinua instala ahi mai ami, nune’e iha tempu kalan ami bele hetan naroman, tanba ami barak fa’an to’o kalan, no mós ense ba sintina sira,” nia informa.
Rekomendasaun hanesan mós hato’o husi vendedór Orlando Colo, “Governu mai instala ona profil sira iha ne’e, maibé bee laiha. Ami agradese tanba tau kedas hanesan sintina, maibé agora seidauk funsiona tanba problema bee, depois kona-ba ahi, kalan-kalan ami tuur nakukun de’it. Ami balun kontinua fa’an ho kalan, maibé ahi laiha. Entaun, ami husu liu-liu ekipa konjunta ne’ebé responsavel ba merkadu ne’e presiza haree ami-nia nesesidade sira-ne’e,” nia hateten.
Notísia relevante:Vendedór balun preokupa tanba la hetan fatin iha merkadu provizóriu Numbei
Hatan ba rekomendasaun ne’e, Diretór Diresaun Rejionál Infraestrutura (DRI), Remígio Nunu Sila, konsidera asuntu rua ne’e importante iha merkadu temporáriu ne’e, instalasaun iluminasaun no bee-moos.
“Kona-ba instalsaun iluminasaun, ita sei identifika tanba liuhusi enkontru konkordánsia ho ekipa integradu katak vendedór sira só mai fa’an de’it la autoriza hela permanente ka toba, signifika instalasaun ba ahi ne’e, ita sei haree ida-ne’ebé mak importante atu-bele liga sira-nia jeradór ne’ebé sei di’ak, tanba sira labele hela iha ne’e, maibé EDTL ita sei haree asuntu ahi nian oinsá bele tau,” nia informa.
Kona-ba fornesimentu bee-moos, daudaun ekipa konjunta instala ona tanke inklui toilet públiku unidade neen, tanba ne’e parte diresaun sei orienta departamentu SAS atu fornese ho karreta tanke, nune’e bele kontribui ba ijiene.
Notísia relevante:Orsamentu millaun $60 ba RAEOA aprovadu iha espesialidade
Jornalista: Abílio Elo Nini
Editór: Rafael Ximenes de A. Belo
