DILI, 22 Novembru (TATOLI) –Sekretáriu Jerál Partidu Frente Revolusionáriu Independente Timor-Leste (FRETILIN), Mari Alkatiri, hateten katak fó votu abstensaun ba proposta Orsamentu Jerál Estadu (OJE) 2026, lori mensajen atu kontribui no buka entendimentu ba kauza komún liberta povu husi ki’ak.
Mari Alkatiri, hato’o deklarasaun ne’e hafoin akompaña direta diskusaun no votasaun finál globál proposta OJE 2026 iha Parlamentu Nasionál, sesta ne’e.
Líder opozisaun ne’e dehan, mai akompaña la’ós orsamentu maibé tanba ne’e orsamentu ikus liu molok kompleta tinan-50 komemora loron proklamasaun indepedénsia, jornada ida atu taka.
Alkatiri, triste orsamentu ne’e la reprezenta didi’ak sakrifísiu tomak halo ona iha tinan-50, orsamentu la mai ho relatóriu ida iha susesu no la mai ho prespetiva ida saida mak halo husi ne’e ba oin. Maibé, FRETILIN la vota kontra no halo intervensaun klaramente hanesan opozisaun konstrutiva atu kontribui hadi’a.
“FRETILIN fó ninia votu abstensaun, tanba konfrontasaun nafatin tenke para. Abstensaun ne’e hanesan mensajen ida, ba ukun-na’in, lideransa no povu tomak, katak FRETILIN hakarak fó rekoñesimentu ida, ba ita-nia erói no martir sira ho onestidade, mas ho rekoñesimentu ida ho di’ak liu atu konklui programa libertasaun povu, ida-ne’e mak orsamentu ne’e la’o tuir,” Sekretáriu Jerál Partidu FRETILIN, Mari Alkatiri hateten.
Tanba jornada ida liu ona hakarak ka lakohi jornada foun hahú. “Se ita hakarak define kada jornada tinan-50, entaun ita tenke iha perspetiva agora ita ba tinan-50 tan, ita hakarak saida ba ita-nia povu, só ita bele halo buat ne’e, bainhira iha programa polítika ida loloos, ba liberta povu husi mukit,” nia dehan.
Hodi salienta, tanba país restaura indepedénsia tinan-23 ona kontinua alternativa dependénsia ba Mina-Rai, laiha ekonomia diverfisikada.
“Ha’u, la haree prespetiva iha ne’ebá, dehan atu dezenvolve kapasidade setór produtivu, setór primáriu, kadeia valór,” Alkatiri preokupa.
Nune’e, FRETILIN nafatin ko’alia fó abstesaun katak ne’e kontensaun atu sai ona husi konfrontasaun tama ba periódu kontensaun. “Ne’e hanesan mensajen ida, FRETILIN, prontu atu kontribui, ita labele hanoin de’it síklu eleitorál, tenke hanoin kauza komún, ita tenke define fila-fali,” Sekretáriu Jerál FRETILIN, Mari Alkatiri afirma.
Ba lideransa nasionál iha oportunidade iha tinan nia laran atu harii kondisaun hodi bele halo tranzisaun, signifika tenke iha kapasidade buka entendimentu hodi hanoin nafatin ba kotuk atu hateke ba oin.
“Ne’e mak tinan-2026 ba oin, ne’e oportunidade ita tenke fó ba malu para bele iha entendimentu, define fali jornada foun, bele kumpri mós programa, polítika, valór no prinsípiu luta nian, libertasaun povu,” nia apela.
Notísia relevante:https://tatoli.tl/2025/11/21/pn-aprova-proposta-oje-2026-iha-final-global/
Jornalista:Nelson de Sousa
Editór: Rafael Ximenes de A. Belo
