DILI, 24 Novembru 2025 (TATOLI)–Antigu Prezidente Autoridade (PA) Rejiaun Administrativa Espesiál Oekusi Ambeno (RAEOA) no Zona Espesiál Ekonomia Sosiál Merkadu (ZEEMS), Mari Alkatiri no Arsénio Paixão Bano, Segunda ne’e, marka prezensa iha Ministeriu Públiku (MP) hodi presta deklarasaun kona-ba projetu formesimentu bee-moos ba komunidade iha Atáuru.
Mari Alkatiri mai iha edifísiu Prokuradoria Jerál Repúblika (PGR) Kolmera iha oras 09:00 dadeer, ho karreta privada xapa matríkula 16.954 A, akompaña husi nia eskoltu Korpu Seguransa Pesoál (CSP) no Advogadu Privadu Arlindo Sanches hodi la’o tama bá Gabinete Sentrál Kombate Korrupsaun no Krime Organizadu (GCCCO) hodi submete ba prosesu dilijente iha Ministeriu Públiku (MP).
Enkuatu, Arsénio Paixão Bano mai iha MP iha 10:00 ho karreta privada xapa mátrikulu APB 2323.
MP liuhusi Prokuradór Titulár ne’ebé kaer prosesu ne’e rona sira-nia deklarasaun separadamente.
Notísia relevante : Uma-kain 100 iha Vessoru la’o ain killometru ida hodi bá kuru bee moos
Iha parte dadeer, hahú husi tuku 09:00 to’o 12:41, MP arrola uluk deklarasaun Mari Alkatiri nian, enkuantu Arsénio Bano, MP kontinua arrolla nia deklarasaun liga ho prosesu fornesimentu bee-moos ZEEMS.
Bainhira jornalista konfirma, Antigu PA RAEOA Mari Alkatiri la esplika detallu kona-ba objetivu presta deklarasaun iha MP.
“Ha’u labele kóalia ha’u-nia prezensa iha Ministeriu Públiku, enkuantu situasaun iha Ministériu Públiku laiha publisidade ne’e lei mak bandu ha’u, tanba sei segredu justisa,” Mari hateten ba Jornalista sira hafoin presta deklarasaun iha MP.
Jornalista : Natalino Costa
Editora : Julia Chatarina
