Jurista husu MP aselera prosesu investigasaun ba Ró Haksolok
DILI, 24 Novembru 2025 (TATOLI)–Jurista Timoroan, Octávio Cardoso husu ba Ministériu Públiku (MP) atu aselera prosesu investigasaun ba Ró Haksolok.
Tuir jurista ne’e, kazu Ró Haksolok la’o durante tinan barak ona, desde tinan 2014 to’o agora, maibé MP seidauk finaliza ninia investigasaun.
“Prosesu ida-ne’e sai hanesan prosesu ne’ebé públiku tomak akompaña, dalaruma ita haree hanesan konsumu públiku, liuliu oinsá ita atu haree katak fó tendénsia ba ita-nia líder sira ne’ebé mak iha responsabilidade másimu ba prosesu ida-ne’e, tanba ida-ne’e ba interrese públiku, tanba ne’e espera bele prodús akuzasaun hodi lori bá Tribunál,” Octávio Cardoso hateten ba Jornalista sira iha Prokuradoria Jerál Repúblika (PGR), Kolmera, Segunda ne’e.
Nia espera prosesu ne’e tama ona no husu atu kontinua nafatin akuzasaun iha Tribunál.
“Sé de’it maka envolve iha laran, la haree ba sé sé, atu nune’e hotu akompaña labele hamosu preiskrisaun ba prazu kazu ne’e. Tanba depoisde iha prazu ne’ebé limita, kuandu laiha akuzasaun, iha posibilidade bele mosu preiskrisaun prazu ba iha prosesu ida-ne’e,” nia akresenta.
Notísia relevante : Bankada CNRT solisita ba Governu aselera auditoria ba Ró Haksolok
Kazu Ró Haksolok ne’e laiha konflitu interrese iha Prokuradór Titulár, maibé ein prinsípiu devér ne’ebé lei atribui ba MP liuhusi Prokuradór ne’ebé kaer prosesu ne’e tenke halo tuir Kódigu Prosesu Penál ne’ebé mak iha no ba prazu ne’ebé mak iha tenke asegura, tanba prosesu ida-ne’e la sees husi konkursu baibain.
“Esperiénsia katak, karik iha kontratu balun ne’ebé akontese, karik iha fallansu ne’ebé akontese, hanesan sidadaun baibain ida no kompañia ne’ebé envolve iha prosesu ne’e, bele dehan nia tenke ba hatan iha prosesu,” Jurista katak.
Nia husu atu prevene preskrisaun ba akuzasaun kazu ne’e, nune’e Prokuradór Titulár mak tenke aselera prosesu ne’e, karik lae Defeza husi Arguidu ba kazu Ró Haksolok ne’e bele indefere prosesu ne’e ho razaun tanba parte defeza mós bele haree prosesu ne’e tarde. Nia durasaun tempu tanba kazu ne’e tinan 11 ona no laiha akuzasaun bele mosu preskrisaun, nune’e mós bele mosu konflitu ruma.
Octávio nota katak azu Ró Haksolok ne’e nia andamentu prosesu ne’e kleur, ein prinsípiu katak konkursu públiku iha prosesu ne’e karik kompañia ne’ebé envolve iha prosesu ne’e nia bele responsabiliza.
“Tuir loloos ró refere tenke iha ona Timor, maibé to’o agora Ró ne’e la mai nune’e mak tenke husu responsabilidade ba kompañia,” nia tenik.
Jornalista : Natalino Costa
Editora : Julia Chatarina
