Kualifikasaun AFC Asian Cup U-17, Xina hurlele Lafaek 14-0
DILI, 24 Novembru 2025 (TATOLI)—Ekipa Futeból Xina hurlele Selesaun Nasionál Futeból Timor-Leste ho skor 14-0 iha jogu kontinuasaun kualifikasaun iha faze Grupu A AFC Asian Cup U-17 ne’ebé hala’o iha Xina, Segunda ne’e.
Ekipa uma-na’in iha jogu parte dahuluk prodús golu 6-0 ne’ebé enxe husi jogadór sira hanesan Xhang Bolin iha minutu hitu (7) no 31, Zhang Yuyao liuhusi penalidade iha minutu 17, Xie Jin 33, 34 no Shuai Weihao iha minutu 37.
Notísia relevante: Selesaun nasionál hahú preparasaun antes partisipa kualifikasaun AFC Asian Cup U-17
Ekipa Lafaek (Timor-Leste) ne’ebé maioria jogadór postura badak, lakon fíziku no menus skill indivíduu liuliu derrota liután iha parte daruak iha-ne’ebé ekipa Xina prodús tan golu ualu hodi rezulta tabela skor ramata ho 14-0 ne’ebé prodús husi jogadór sira hanesan Wang Heyi iha minutu 51, Shuai Weihao 54, 79, penalidade Wan Xiang iha minutu 58, Xie Jin iha minutu 64, Zhao Songyuan 71 no golu rua Xha shangyuan iha minutu 72 no 90.
Timor-Leste rasik hala’o ona jogu rua iha-ne’ebé derrota dahuluk ho Bangladés 5-0 nune’e okupa iha pozisaun dalimak ho pontu 0, enkuantu Xina okupa iha pozisaun dahuluk hafoin manán rua (2) husi jogu rua (2) ho pontu neen (6).
Entretantu, kompetisaun apuramentu AFC Asian Cup U-17, ekipa Timor-Leste kolokadu iha Grupu A hamutuk ho nasaun haat seluk kompostu Xina, Bahrain, Brunei Darussalam, Srilanka no Bangladés.
Jornalista: Natalino Belo
Editór: Xisto Freitas da Piedade
