VIKEKE, 24 Novembru 2025 (TATOLI)—Servisu Ministériu Agrikultura Peska, Pekuária no Floresta (SMAPPF) Munisípiu Vikeke liuhusi Diresaun Veterinária fó ona vasina ba komunidade nia asu hamutuk 400-resin durante loron lima iha Suku Uma-Ki’ik, Postu Vikeke Vila, Munisípiu Vikeke.
“Kona-ba programa vasinasaun ba komunidade nia asu, ita foin tama suku rua iha parte Suku Uma-Ki’ik, Postu Vikeke Vila,” Xefe Departamentu Veterináriu Munisípiu Vikeke, Domingos do Carmo Pinto ba Tatoli iha postu Vikeke Vila, Segunda ne’e.
Domingos haktuir vasina prevensaun ba raiva kada suku ho durasaun loron lima tanba suku eziste hamutuk 38, nune’e bá-oin sei dezloka fali ba Postu Lakluta, postu ne’ebé baliza ho Munisípiu Manatutu.
Notísia relevante: Autoridade husu populasaun Uma-Ki’ik koopera vasina asu
Nia dehan, dezafiu ne’ebé ekipa veterinária munisípiu enfrenta mak liuliu ba transporte tula ekipamentu vasina, rede, ai-moruk, cool box rai ai-moruk no seluk tan.
“Foin lalais loron sanulu ne’e nasionál mak apoiu transporte ba ami hodi halo vasina ba komunidade nia asu iha suku rua. Bá-oin ne’e ekipa nasionál la apoiu ona transporte ba ami, entaun transporte mak sai difikulta ba ami-nia servisu,” nia esplika.
Kona-ba estoke ai-moruk vasina, nia tenik, daudaun ne’e estoke ai-moruk vasina prevensaun raiva ba Munisípiu Vikeke sei iha 1.000-resin, maibé brosura mak hotu ona, ne’ebé sira sei relata ba nasionál hodi haruka brosura mai hodi distribui ba komunidade, tanba kada uma-kain tenke hetan brosura kona-ba prevensaun vírus raiva nian.
Tuir dadus, asu iha Munisípiu Vikeke totál hamutuk 1.220 ne’ebé hetan ona vasinasaun ba prevensaun vírus raiva. Númeru ne’e kompostu husi Suku Karaubalu hamutuk 800 no suku Uma-Ki’ik hamutuk 420.
Enkuantu, vasinadór husi departamentu veterináriu hamutuk na’in-15 ne’ebé kompleta ona dose daruak hodi fó vasina ba komunidade nia asu iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
