UNITAL FC konsege rekolla pontu tolu hafoin liki VDL 0-4
DILI, 24 Novembru 2025 (TATOLI)—Ekipa futeból femininu UNITAL Football Club konsege rekolla pontu tolu hafoin liki (manán) Vale de Lahane (VDL) iha jogu jornada dalimak primeira divizaun Liga Futeból Femininu Timor-Leste (LFFTL).
Ekipa UNITAL ne’ebé derrota dala tolu ho skor boot konsege gaña vitória bainhira kontra ekipa promovida VDL FC 0-4 ne’ebé hala’o iha Estádiu Munisipál Dili, Sábadu (22/11/2024).
Notísia relevante: Manán UNITAL 4-0, Maranatha sa’e ba pozisaun dalimak
Elementu treinadór Abel Barbosa ne’e lidera 0-1 iha primeira parte iha-ne’ebé golu referidu prodús husi jogadora Liandra Zenita iha minutu 25, enkuantu golu tolu seluk prodús iha parte daruak ne’ebé enxe husi jogadora Suzana Freitas iha minutu 66, Guilhermina Cunha 86 no golu ikus enxe husi jogadora Zélia Lakamali iha minutu ikus 89.
Ho rezultadu jogu referidu, UNITAL FC hakat ba pozisaun daneen iha tabela klasifikasaun ho pontu neen (6), rezultadu husi manán rua (2) no derrota tolu (3), enkuantu VDL FC okupa iha pozisaun daualu hafoin rekolla pontu tolu (3), rezultadu manán ida (1) no derrota 4.
Jornalista: Natalino Belo
Editór: Xisto Freitas da Piedade
