DILI, 25 Novembru 2025 (TATOLI)—Diretór Servisu Kooorporativu iha Ministériu Saúde, Narcisio Fernandes, informa bolseiru na’in-30 dezloka ba Havana-Kuba hodi hasai espesialidade.
“Ita-nia médiku sira-ne’ebé mak atu estudu iha Havana Kuba sira dezloka ona iha horisehik. Sira-ne’e inklui Polisia Nasionál Timor-Leste na’in-tolu no orsamentu ne’ebé mak aumenta, entaun ita haruka ona sira ba hala’o sira-nia estudu,” Narcisio Fernandes hateten ba Agência TATOLI, ohin.
Nia esplika, médiku sira-ne’ebé mak atu kontinua ba hala’o estudu iha nasaun fiji ida ne’e hahú iha tinan oin.
“Agora bolsu estudu ba fiji nian ne’e sira ba iha Janeiru lae Fevereiru mak ba, maibé agora daudaun sira Kuba mak uluk ona,” nia hateten.
Antes ne’e vaga refere loke ba mediku na’in-16 mak atu ba estudu iha Kuba, maibé numeru ne’ebé mak agora iha aumenta ho sira-ne’ebé suplente tanba orsamentu sufisiente.
“Sira-ne’ebé suplente ne’e uluk sira teste hotu, tanba deit orsamentu sufisiente husi FDCH entaun aumenta hodi sira ba hotu estuda iha Kuba,” nia informa.
Antes ne’e, Ministra Saúde Elia dos Reis Amaral no hamutuk ho Vise-Ministru ba Fortalesimentu Institusional Saúde José dos Reis Magno, partisipa iha serimónia despedida ba bolseiru medisina hamutuk ema na’in-30 ne’ebé sei kontinua sira-nia estudu espesializadu iha área oioin saúde nian, iha Havana, Kuba.
Ministériu Saúde despede bolseiru Medisina espesialista 30 ne’e kompostu husi feto na’in-10 no mane na’in-20.
“Ita boot sira hatene katak kapasitasaun rekursu umanu nian faz parte ba iha IX Governu nian, tanba prestasaun servisu kuidadu saúde sekundária no tersiaria ita presiza espesialista. Ne’ebé agradese ba Ministériu Planeamentu no Investimentu Estratéjiku (MPIE) ho nia ekipa tomak, apoiu ba iha servisu sira, oinsá atu hasa’e kapasitasaun. Kapasitasaun ne’ebé mak ita iha no haruka ba iha rai-li’ur hanesan nasaun Kuba iha mós balun liuhusi parseiru sira liuliu Nasaun Fiji, ita mós tentativa atu ba Filipina, Papua, Nova-Guine, sira-ne’e hotu hola parte ba iha programa hosi IX governu nian,” Elia dehan.
Nia relata, Ministériu Saúde planeia atu kontinua halo selesaun ba Profisionál Saúde sira-ne’ebé atu hasai sira-nia espesialidade ba tinan oin ho totál vaga 40 ka 50, ne’ebé mak sei kontinua nafatin hala’o estudu iha rai-li’ur.
Nune’e MS hala’o hela koordenasaun ho Governu Australia ne’ebé mak agora hala’o hela kapasitasaun iha pós-graduasaun kada sira-nia estudu.
“MS husu ba servisu médiku sira katak servisu iha medisina ne’e hanesan misaun ida ne’ebé bolu hosi ita-nia fuan, ne’ebé mak hakarak sai médiku, maibé husu mós atu tau atensaun ba sira-nia saúde,” nia dehan.
Entertantu, partisipa iha serimónia despedida ne’e mai husi Kuadru Ezekutivu MS, Reprezentante hosi Institutu Nasionál Administrasaun Públika (INAP), Fundu Dezenvolvimentu Kapital Humanu (FDCH).
Bolseiru na’in-30 ne’ebé dezloka ba Havana-Kuba ne’e sei hasai espesialidade iha área nefrologia, neurocirurgia, cirurgia craniana, ortopedia, cirurgia vascular no medicina interna.
Jornalista : Felicidade Ximenes
Editór : Cancio Ximenes
