DILI,25 Novembru 2025 (TATOLI )–Institutu Defesa Nasionál (IDN) Timor-Leste no g7+, Tersa ne’e, asina akordu atu fortelese kolaborasaun iha área importante sira, liuliu ba partilla programa formasaun ba pás.
Memorandu ne’e asina husi Sekretáriu Jerál g7+, Helder da Costa, Diretór interinu IDN, Nuno Corvelo Sarmento, iha ámbitu semináriu ba dala-5 Fórum Tasi Comunidade dos Países de Língua Portuguesa (CPLP) ho tema: “Desafiu Judisiál iha jestaun no utilizasaun tasi.”
Iha okaziaun ne’e, hetan observasaun ka sasin husi, Primeiru-Ministru, Kay Rala Xanana Gusmão no Ministru Defesa Timor-Leste Kontra Almirante Donaciano do Rosário da Costa Gomes ‘Pedro Klamar Fuik’.
Notísia relevante : Komandu PNTL-IDN koopera fó formasaun ba membru promovidu na’in-2.747
Diretor interinu IDN, Nuno Corvelho Sarmento hateten, objetivu hosi akordu ne’e hodi promove konstrusaun pás iha ámbitu edukasaun iha kampus ne’ebé relevante.
“Akordu ida-ne’e fó oportunidade ba Estadu membru g7+ atu partisipá iha programa ensinu no formasaun iha IDN-TL nian. No akordu ne’e hatudu kompromisu partilla atu promove konesimentu, diálogu, no kooperasaun ba futuru ne’ebé mais di’ak no resiliente,” Nuno hateten ba jornalista sira iha salaun Ministériu Negósiu Estranjeiru no Kooperasaun (MNEK), Tersa ne’e.
Akordu ne’e importante hodi bele fó koñesimentu balun kona-ba realidade ne’ebé membru nasaun g7+ sira iha.
“Nune’e, IDN bele partilla programa pás hodi akompaña mós situasaun membru
g7+ sira hasoru, nune’e ba oin bele partilla liután. Maibé iha oportunidade ne’e IDN mós selebra akordu kontinuadade ho Universidade Lisboa Portugál nian,” nia katak.
Nuno esplika, akordu ne’ebé IDN selebra ho Universidade Lisboa Portugál ho ninia objetivu fó prioridade ba profesór sira husi Lisboa bele partilla sira-nia koñesimentu.
“Kooperasaun ohin asina ne’e ho durasaun tinan-rua nia laran, hahú husi tinan ne’e to’o tinan oin mai,” nia tenik.
Jornalista : Natalino Costa
Editora : Julia Chatarina
