DILI, 25 Novembru 2025 (TATOLI)—Diretór interinu Institutu Defeza Nasionál Timor-Leste (IDN-TL), Nuno Corvelo Sarmento informa, konstrusaun edifísiu Akademia Militar Konjunta iha Munisípiu Aileu daudaun kuaze atinje 50%.
“Konstrusaun la’o daudaun to’o ona iha dalan klaran, tanba ita iha planu ba tinan oin mai iha Fevereiru ne’e hahú ona ho formasaun ba akademia, ita bele dehan to’o agora besik 50% ona nia prosesu konstrusaun,” Diretór interinu hateten ba Jornalista iha salaun Ministériu Negósiu Estranjeiru no Kooperasaun, Praia dos Coqueiros, Tersa ne’e.
Notísia relevante : Konstrusaun edifísiu ba akademia militár konjunta iha Aileu hahú la’o
Bainhira konstrusaun edifísiu ne’e prontu mak sei oferese formasaun ba ema na’in-120.
“Formadór ne’e ita foti husi ita-nia rekursu ne’ebé ita iha no ita sei foti mós husi país ne’ebé ita halo ona kooperasaun no sira ne’e mak sei mai ajuda hatutan koñesimentu ita-nia ema, enkuantu ita prepara ita-nia ema. Ha’u garantia katak konstrusaun 50% ne’e to’o Fevereiru 2026 inaugura buat hotu,” nia akresenta.
Jornalista : Natalino Costa
Editora : Julia Chatarina
