ME hahú xamada submisaun dokumentu ba Bolsa Kandidatu Ensinu Sekundáriu

DILI, 25 Novembru 2025 (TATOLI)—Ministériu Edukasaun (ME), Tersa ne’e, hahú ona halo xamada no aseitasaun ba submisaun dokumentu komprovativu Bolsa Kandidatu Ensinu Sekundáriu hamutuk 624.

“Bolsa kandidatu hamutuk 624 mak ohin Ministériu Edukasaun sei halo xamada hodi halo submisaun dokumentu. Ida-ne’e depoiz submete dokumentu no aseitasaun maka foin hatene 624 hosi agrupumentu ka númeru ranking, hafoin hakat bá formasaun ne’ebé na’in-250 mak sei tuir formasaun,” Diretór Nasionál Rekursu Umanu ME, João Amaral dehan ba TATOLI, via Whatsapp, Tersa ne’e.

Diretór João Amaral informa hahú 25-29 Novembru 2025, Bolsa Kandidatu Ensinu Sekundáriu sira sei prenxe vaga kuadru pesoál iha eskola ensinu sekundáriu jerál no tékniku vokasionál hodi integra ba karreira dosente.

Notísia relevante: ME planeia xamada bolsa kandidatu ensinu sekundáriu hamutuk 700 iha Novembru 

Bazeia ba Desizaun n°. 7380/2025/CFP ne’ebé aprova númeru vaga ba profesór Grau C, Eskalaun 1, nune’e Diresaun Jerál Administrasaun no Finansa aviza ba kandidatu sira atu haree avizu kolokasaun iha aneksu kona-ba aseitasaun.

Tanba ne’e, nia dehan, ba kandidatu sira-ne’ebé konkorda ho kolokasaun referida atu mai asina termu aseitasaun molok integra ba karreira dosente no submete dokumentu komprovativu sira hanesan sertidaun RDTL, billete identifika ka kartaun eleitorál, rejistu kriminál ne’ebé válidu no atestadu médiku hosi Ospitál Nasionál Guido Valadares inklui Diploma Mínimu Lisensiatura ne’ebé legalizadu hosi Ministériu Ensinu Superiór, Siénsia no Kultura (MESSK) no mós konta bankária ho númeru IBAN.

Aleinde ne’e, kona-ba pontu importante sira hanesan kandidatu sira bele ba uluk survey fatin kolokasaun bazeia ba aneksu kolokasaun iha lista. Nune’e, fó informasaun klara ba kandidatu idak-idak molok foti desizaun atu aseita ka rejeita xamada kolokasaun, iha posibilidade ba kandidatu sira-ne’ebé hakarak troka malu fatin kolokasaun, tenke identifika ema ne’ebé ho intensaun hanesan ho konsiderasaun ba área disiplina no tenke prenxe formatu troka malu fatin kolokasaun.

Kandidatu sira-ne’ebé la marka prezensa iha data ne’ebé determinadu ona hodi hatán ba xamada kolokasaun, sei labele partisipa iha serimónia pose no konsidera deziste, no kandidatu sira-ne’ebé la aseita ka rejeita ho xamada kolokasaun, automatikamente númeru seriasaun kandidatu referidu sei bá liu lista ikus.

Jornalista: Osória Marques

Editór: Xisto Freitas da Piedade