KOVALIMA, 25 Novembru 2025 (TATOLI)- Ministru Obra Públiku (MOP), Samuel Marçal, tersa ne’e, hamutuk ho membru Governu sira ho Autoridade Munisípiu Ainaro no Kovalima, lansa fatuk dahuluk ba reabilitasaun estrada diresaun Suku Casa “Fatuk Boot”, Munisípiu Ainaro bá Suku Webaba, Postu Zumalai, Munisípiu Kovalima.
Molok lansa, lia-nain sira husi suku Raimea ho Mape, Postu Administrativu Zumalai hala’o uluk lisan ka kultura hodi hetan matak malirin husi beiala sira.
“Ita atu asiste serimónia fatuk dahuluk reabilitasaun estrada Casa- Ainaro no Webaba-Kovalima ne’ebé maka durante komunidade sira hein hela importante projetu ne’e ezekuta tuir kontratu ho kualidade tanba osan hirak ne’e povu ni’an entaun povu bele hetan benefisiu ho di’ak”, Ministru Obra Públiku, Samuel Marçal hoto’o liuhusi nia diskursu hafoin lansa fatuk dahuluk iha Webaba, Postu Zumalai, ohin.
Governante ne’e dehan, Osan povu nian tanba nia husu ba autoridade lokál populasaun hotu iha fatin referidu atu kontribui no asegura inklui kontrola hodi empreza bele halo reabilitasaun ho di’ak no kualidade.
Iha Sorin Seluk, Prezidente Autoridade Munisípiu Ainaro Manuela, Georgina Carmo Bucar Cortereal, hato’o agradese ba Governu, tanba durante komunidade sira hein hela atu halo reabilitasaun Estrada maibé ohin loron sai ona realidade.
“Agradese ba Ministériu Obra públika, ami kontente tanba reabilitasaun estrada ne’ebé hanesan asuntu prinsipál no komunidade presiza duni”, nia afirma.
PAM Ainaro ne’e husu ba empraza sira reabilita estrada tenke garante nia kualidade, nune’e fasilita komunidade sira nia movimentu ho transporte públiku no privada.
Entretantu, Prezidente Autoridade Munisípiu Kovalima, Miguel Armada Cardoso, husu ba komunidade sira atu labele impede empreza atu halo reabilitasaun estrada ne’e ho lalais.
“Ho serimónia reabilitasaun estrada komunidade sire bele sente ona nia naroman tanba durante komunidade sira halerik bele responde ona”, nia agradese.
Empreza Aitula promete garante kualidade
Biban ne’e, Diretór Empreza Ai-tula, Silveiro Perreira Maubere, esplika katak Governu fi’ar ba empreza Ai-tula liuhusi prosesu konkursu públiku iha Komisaun Nasionál Aprovizionamentu ( CNA) ba reabilitasaun estrada ho kilometru neen.
“ Ami husi empreza Ai-tula ho nia prinsípiu rasik bainhira halo rebabilitasaun estrada nia fó importánsia dahuluk maka ami hakarak garante projetu ne’e nia kualidania promete.
Projetu reabilitasaun ne’e empreza rua mak halo konsorsiu hanesan Empreza Cina responsavel estrada kilometru 7+000 ho nia orsamentu $4.856.254,26 ho durasaun reabilitasaun durante loron 365.
enkuantu Empreza Ai-tula reabilita estrada kilometru neen ho nia orsamentu hamutuk $4.023.143,73 ho nia durasaun durante loron 365.
Serimónia tau fatuk dahuluk ba reabilitasaun estrada ne’e partisipa direta husi ekipa Ministériu Obra Públiku, Ministru Asuntu Kombatente Libertasaun Nasionál, Vise Ministru Saúde, Sekretàriu Estadu Dezenvolmentu Lokál, Sekretàriu Estadu Asuntu Toponimia no Organizasaun Urbanu (SEATOU) no Komunidade sira.
Notisia relevante:Povu Lolotoe hein MOP lansa projetu reabilitasaun estrada
Jornalista:Celestina Teles
Editór:Florencio Miranda Ximenes
