BOBONARU, 27 Outubru 2025 (TATOLI)-Populasaun iha postu administrativu Loloto’e, munisípiu Bobonaru, hein Ministériu Obra Públika (MOP) atu lansa projetu reablitasaun estrada urbana liga husi suku Lontas bá postu administrativu Lolotoe Vila ho distánsia kilómetru 8,9.
Administradór Postu Administrativu Lolotoe, Sebastião Marçal, dehan povu hein promesa Ministru Obra Publika, Samuel Marçal, ne’ebé hato’o iha semana liubá katak estrada ida husi Zulo-Il mai Lolotoe Vila kilómetru 8,9 aprova ona no tempu badak halo lansamentu primeira padre.
Notsia relevante: Kondisaun estrada Zulo-il afeta ba folin foos iha Loloto’e sa’e $21
“Ministru rasik hato’o iha Lupal, Dilai, foin dadauk iha inaugurasaun eletrisidade iha suku Opa ho Lupal. Ha’u rasik partisipa”, Sebastião Marçal informa ba jornalista sira foin lalais ne’e.
Nia fundamenta katak tempu ona atu Governu implementa projetu ne’e, tanba tinan-tinan povu Lolotoe sempre halerik ba estrada.
“Udan boot kuandu tun ona estrada sempre kotu. Mota komesa husi fronteira Bobonaru nia tun mai ne’e [halo estrada] aat hotu, liuliu estrada ida tama mai postu Lolotoe, fatin ida naran Zulo-Il, ida-ne’e mak sai preokupasaun”, dehan.
Reprezentante komunidade Lolotoe, Martinho Francisco, lamenta tanba kondisaun estrada ne’e difikulta tebes movimentasaun públiku, liuliu iha tempu udan.
Problema ne’e afeta mós ba folin foos no nesesidade bazika sa’e iha Lolotoe, aleinde ne’e durante tinan barak ona transporte públiku la halo movimentasaun ba-mai.
“Ami husu ba Ministériu Obra Públika tenke hadi’a [estrada]. Ami povu presiza desfruta maski transporte públiku ne’e selu, maibé amia hakarak tun iha uma oin, más ami-nia estrada mak la di’ak. Ami la ezije buat ida, la ezije kona-ba hahán ka osan, ami presiza mak hadi’a estrada para ami movimentu ne’e di’ak”, nia hato’o.
Postu administrativu Lolotoe iha suku hitu no aldeia 20, ho nia totál populasaun hamutuk 7.695 no xefe família 1.591.
Notísia relevante: Reabilitasaun estrada iha Lolotoe presiza empreza ne’ebé iha esperiénsia
Jornalista: Sergio da Cruz
Editora: Maria Auxiliadora
