ASEAN no Austrália promove papél juventude iha radikalizmu no violénsia estrema
BALI, 26 Novembru 2025 (TATOLI)—Estadu membru ASEAN hamutuk ho Austrália, reafirma sira-nia kompromisu atu hametin papél juventude nian hodi prevene radikalizmu no violénsia estrema liuhusi Workshop Kontra Terrorizmu ASEAN no Austrália, ne’ebé hala’o iha loron 26 to’o 27 Novembru 2025, iha Bali, Indonézia.
Xefe Ezekutivu Gabinete Koperasaun Internasionál Divizaun Relasaun Internasionál Polísia Nasionál Indonézia, Brigadeiru-Jenerál Oktavianus Martin hato’o nia apresiasaun ba Governu Austrália hodi kontinua apoiu ba ajenda kontra terrorizmu ASEAN.
Nia dehan, foin-sa’e sira hala’o papél estratéjiku ida hodi harii komunidade nia reziliénsia hasoru radikalizmu, liuliu iha espasu dijitál.
“Foin-sa’e sira la’ós de’it benefisiáriu sira husi polítika sira, maibé parseiru sira, no inovadór sira hosi rejiaun ida-ne’ebé seguru liu no reziliénte liu,” Brigjen Oktavianus hateten iha mensajen ne’ebé hato’o durante eventu iha Anvaya Resort Bali, Kuarta ne’e.
Brigadeiru Jenerál ne’e subliña katak maizumenus um-tersu hosi populasaun ASEAN nian mak foin-sa’e sira, ne’ebé halo grupu ida-ne’e sai vulneravel ba esplorasaun hosi grupu estremista sira, maibé mós iha kapasidade signifikativu atu sai ajente ba mudansa.
Nia mós destaka enkuadramentu rejionál oioin ne’ebé koloka foin-sa’e sira hanesan pilár krítiku ida ba esforsu sira prevensaun estremizmu, inklui Deklarasaun Manila 2017, Planu Serbisu Bali 2019–2025, no Deklarasaun Líder sira ASEAN nian kona-ba Uzu Desportu nian ba Prevensaun Violénsia Estrema.
Notísia relevante : Timoroan 251 termina formasaun profisionál-prontu kompete ba merkadu ASEAN
Workshop ida-ne’e hanesan parte ida husi implementasaun Planu Serbisu Bali nian, ne’ebé maka estende ona to’o 2026, no Planu Serbisu SOMTC–Austrália nian kona-ba Kooperasaun Kombate Krime Transnasionál 2022–2025. Indonézia, nu’udar Xefe Prinsipál Voluntáriu ba setór kontra-terorizmu, reafirma ninia kompromisu atu hametin kooperasaun entre setór sira no garante katak juventude nia lian integradu iha polítika.
Iha mensajen vídeo ida, Embaixadora Austrália nian ba Kontra Terorizmu, Gemma Huggins, subliña importánsia husi parseria ASEAN-Austrália nian hodi rezolve ameasa terorizmu nian ne’ebé maka evolui daudaun.
“Dezafiu radikalizmu juventude akontese iha rejionál no globál. Juventude la’ós de’it halo parte iha solusaun, sira hanesan parseiru sira ne’ebé iha konfiansa,” nia reforsa.
Nia destaka aumentu espozisaun husi joven sira ba konteúdu estremista iha espasu dijitál. Tanba ne’e, konsidera katak kolaborasaun no empoderamentu juventude sai xave atu prevene radikalizasaun iha faze inísiu.
Diretór Seksaun Kontra Terrorizmu Ázia nian iha DFAT Austrália, Robert Rushby reafirma, kompromisu Austrália nian atu apoia ASEAN hodi harii reziliénsia rejionál.
“Ita sai efetivu liu bainhira ita serbisu hamutuk. Workshop ne’e hametin momentum koperasaun iha hakbiit joven sira hanesan parseiru prevensaun nian,” nia esplika.
Rushby mós apresia Indonézia nia knaar hanesan motór xave ba kooperasaun rejionál no apoiu tékniku hosi instituisaun oioin iha Indonézia no Austrália.
Durante loron-rua nia laran, workshop ne’e aborda asuntu xave lubuk ida, inklui tendénsia foun iha radikalizmu online, inisiativa reziliénsia komunitária bazeia ba foin-sa’e sira, sistema alerta sedu no prevensaun bazeia ba komunidade, diálogu interjerasionál, papél jéneru, no lideransa foin-sa’e sira nian.
Diskusaun sira-ne’e ho objetivu atu hametin arkitetura seguransa rejionál no asegura partisipasaun juventude nian iha polítika sira prevensaun/kontra violénsia estremizmu (P/CVE).
Tinan ne’e, Timor-Leste mós partisipa nu’udar membru ASEAN, ho reprezentante husi Servisu Migrasaun, Diresaun Jerál Juventude (MJDAK), Sentru ba Haburas Movimentus Direitus Umanus (SBHMDU) no Asosiasaun Jornalista Timor-Leste (AJTL).
Workshop ASEAN no Australia ne’e afirma parte rua nia kompromisu atu hametin juventude nia knaar nu’udar parseiru estratéjiku hodi kria rejiaun ida ne’ebé seguru, inkluzivu, no pasífiku liu.
Jornalista : Cidalia Fátima
Editora : Julia Chatarina
