BOBONARU, 26 Novembru 2025 (TATOLI) – Atu komemora Loron Proklamasaun Independénsia ba da-50, munisípiu Bobonaro organiza kompetisaun kulturál ne’ebé envolve jerasaun foun no tuan husi suku kemak ho bunak iha kapitál Maliana.
Eventu ne’ebé hala’o ho objetivu atu prezerva no introdús kultura lokál ba joven sira.
Egídio Loi Siga, Xefe Seksaun Animasaun no membru komisaun organizadora, hateten bainhira la promove kultura sei sai problema tanba foinsa’e sira ohin loron ladún hatene nia kultura.
Notísia Relevante:Suku Tapo realiza festa kulturál halibur fini ai-han
“Joven barak ohin loron ladún koñese ita-nia kultura, tanba ne’e, eventu sira hanesan ne’e importante atu promove nafatin ita-nia kultura ba tinan naruk”, atuál Diretór Servisu Munisipál Aprovizionamentu Munisípiu Bobonaru ne’e dehan ba Tatoli, iha Jináziu Maliana, ohin.
Loi Siga afirma katak eventu ne’e hatudu kultura oioin husi suku Raifun, Lahomea, Odomau, no Saburai, ne’ebé idaidak ho nia signifikadu.
Kompetisaun ne’e mós iha ekipa júri ne’ebé sei avalia bazeia ba rekizitu ne’ebé prepara ona. “Kuandu la prienxe rekezitu ne’e labele, tanba ita foin tama de’it mós sira avalia tiha ona. Ita bele dehan buat hotu la’o tuir kultura, maibé júri sira haree tuir ninia kerapian, disiplina no seluk tan”, katak.
Xefe suku Raifun, Domingos Salvador, akresenta katak atividade ne’e maioria envolve ferik-katuas sira nu’udar edukadór no prezervadór kulturál. “Ami aprezenta ne’e tebe orijen husi suku parte Kemak Leosibe. Ba oin ami hakarak jerasaun foun sira presiza hatene atu patrimóniu kulturál ne’e moris nafatin. Tanba ita la promove ba joven sira, ba oin katuas ho ferik sira ne’e laiha, sé mak atu kontinua”, nia dehan.
Domingos Salvadór rekomenda ba Autoridade Munisípiu Bobonaru atu kontinua realiza eventu ne’e iha loron importante sira, tanba kultura hanesan rekizitu importante ida atu simu podér lokál.
“Kultura ne’e importante tanba momentu ita-nia nasaun adere ba ASEAN, Estadu ho Governu lori mós ita-nia inan-aman sira husi Ataúru. Sira lori bote, tais, ne’e reprezenta ona kultura Timor-leste”, salienta.
Notísia relevante: Entidade sira simu PAM foun Bobonaru, prometidu sei la halo divizionizmu
Jornalista: Sergio da Cruz
Editora: Maria Auxiliadora
