FDCH halo rekrutamentu ba bolseiru ho justu
DILI, 26 Novembru 2025 (TATOLI)—Diretór Fundu Dezenvolvimentu Kapitál Umanu (FDCH), Júlio Aparício informa bolseiru ne’ebé rekruta husi FDCH ne’e justu, tanba sira servisu hamutuk ho universidade sira husi rai-li’ur hodi fó teste.
“Ba ha’u hanesan diretór ezekutivu, bolseiru ne’ebé rekruta husi FDCH ne’e justu, tanba prosesu hotu ami servisu hamutuk ho universidade sira husi rai-li’ur. Ezemplu, bolseiru sira bá Malázia, ida-ne’e universidade husi Malázia mak fó teste, tanba ne’e ema lahatene ita ne’e veteranu nia-oan ka sé nia oan, maibé buat hotu kredivel,” Júlio Aparício dehan ba jornalista sira, iha nia kna’ar fatin, Kolmera, Dili, Kuarta ne’e, relasiona ho membru Parlamentu Nasionál balun ne’ebé kestiona katak mosu familiarizmu iha bolsu estudu FDCH.
Diretór ne’e esplika, kona-ba valór, realidade estudante balun mai ho valór boot, maibé dalaruma iha teste língua, estudante referidu labele pasa.
“Loos duni, estudante finalista balun valór boot, maibé dalaruma iha teste língua nia la liu. Tanba ne’e, desizaun hotu husi universidade ita tenke kumpre, tanba ema nia ezijénsia ba lisensiatura lingua míninu ho valór tenke 5.0, ba mestradu mínimu ho valór tenke 6.0. Tanba ne’e, husu entidade hotu atu tau-matan ba joven sira,” Júlio esklarese.
Notísia relevante: FDCH haruka tan bolseiru 34 ba universidade tolu iha Brazíl
Nia husu ba instituisaun hotu ne’ebe parseria ho FDCH, atu rekruta bolseiru tenke iha balansu no reprezentante ema hotu.
“Ha’u husu ita hotu hamutuk atu bele hadi’a no prepara rekursu umanu ne’ebe di’ak ba nasaun Timor-Leste, nune’e prosesu teste ita tenke garante kualidade, la’ós ita fó malu de’it to’o ikus ba eskola la hotu,” nia enkoraja.
Júlio la konkorda ho preokupasaun ho deputadu sira-nian iha Parlamentu Nasionál katak mosu familiarizmu iha prosesu rekrutamantu bolseiru.
“Foin daudaun iha aprezentasaun orsamentu FDCH nian iha Parlamentu Nasionál, deputadu balun kestiona katak mosu familiarizmu iha prosesu rekrutamantu bolseiru, ida-ne’e ba ha’u hanesan isu ida. Ha’u husu ba membru Parlamentu Nasionál labele lori isu, maibé bainhira ko’alia ona iha Parlamentu Nasionál tenke hatudu faktu no dudus,” nia hateten.
Jornalista: Osória Marques
Editór: Xisto Freitas da Piedade
