FDCH haruka tan bolseiru 34 ba universidade tolu iha Brazíl

DILI, 26 Novembru 2025 (TATOLI)—Governu liuhosi Ministériu Planeamentu Investimentu Estratéjiku (MPIE), hamutuk ho Fundu Dezenvolvimentu Kapitál Umanu (FDCH-sigla portugeza), Kuarta ne’e, haruka tan ona bolseiru na’in-34 ba Universidade Federál de Viçora, Universidade Federál São Jão Del Rei no Universidade Federál de Ouro Preto iha Brazíl.

Diretór Ezekutivu FDCH, Júlio Aparício informa iha Universidade Federál de Viçora, bolseiru na’in-24 mak hala’o estudu iha-ne’ebá, Universidade Federál São Jão Del Rei iha bolseiru na’in-ida (1) no Universidade Federál de Ouro Preto bolseiru na’in-sia (9).

Hosi númeru ne’e, nia hatutan, na’in-hitu bá hasai kursu mestradu no tolu hasai doutoramentu iha área fízika, matemátika, biolojia. Enkuantu, kursu lisensiatura iha na’in-24 ba área agrikultura, ambientál no ortikultura.

Totál bolseiru hosi tinan 2011-2025 hamutuk 12.131. Ida-ne’e inklui ona bolseiru pur méritu, bolseiru parsiál sira. Hosi númeru ne’e, bolseiru hamutuk 6.275 mak gradua ona no bolseiru ne’ebé mak servisu ona hamutuk rihun 4-resin.

Jornalista: Osória Marques

Editór: Xisto Freitas da Piedade