FFTL husu públiku nafatin apoiu Selesaun Nasionál U-17
DILI, 26 Novembru 2025 (TATOLI)—Federasaun Futeból Timor-Leste (FFTL) husu públiku atu kontinua apoiu jogadór Selesaun Nasionál U-17 ne’ebé atualmente partisipa jogu kualifikasaun Grupu A AFC Asian Cup iha Xina.
Diretór Kompetisaun Eventu FFTL, João Campos rekoñese públiku kestiona relasiona ho Selesaun Nasionál U-17 derrota ho skor boot hasoru Xina no Bangladés iha jogu AFC Asian Cup U-17, maibé importante kontinua motiva no apoiu másimu nune’e hasa’e mentalidade hodi hasoru jogu seluk iha futuru.
“Importante ita nafatin depozita konfiansa ba sira no motiva tanba sira mak sei sai futuru ba selesaun nasionál (senior),” João Campos hateten liuhusi konferénsia imprensa iha edifísiu FFTL, Bairros dos Grilos, Kuarta ne’e.
Notísia relevante: Kualifikasaun AFC Asian Cup U-17, Xina hurlele Lafaek 14-0
Campos hateten, jogadór U-17 selesionadu hamutuk 23 ne’ebé deside hafoin FFTL realiza kompetisaun Kopa Juveníl Sub-17 husi Asosiasaun Futeból Munisipál sira iha nivel rejionál to’o nasionál hodi hala’o preparasaun fulan-ida antes dezloka ba Xina.
Nune’e mós, Diretór Servisu Selesaun Nasionál FFTL, João Manico informa FFTL iha ona planu atu kontinua apoiu jogadór U-17 hanesan hala’o estájiu iha rai-li’ur ho durasaun tinan rua to’o tolu antes define alvu ba ekipa nasionál iha futuru.
“Atuál, ita la tau esperiénsia ba sira maibé federasaun kompromete sei halo investimentu ba sira iha futuru,” Manico deklara.
Manico argumenta, prosesu atu halo preparasaun ekipa futeból iha selesaun nasionál presiza tempu, fasilidade inklui kompetisaun doméstika ne’ebé rutina, tan ne’e FFTL planeia sei kria kompetisaun liga sub-17 ne’ebé sei hala’o iha 2026.
Selesaun Nasionál Timor-Leste U-17 oras ne’e kompete iha jogu kualifikasaun Grupu A AFC Asian Cup ne’ebé derrota ona jogu rua bainhira kontra Bangladés derrota 0-5 no Xina ho skor 14-0.
Entretantu, kompetisaun apuramentu AFC Asian Cup U-17, ekipa Timor-Leste kolokadu iha Grupu A hamutuk ho nasaun haat seluk kompostu Xina, Bahrain, Brunei Darussalam, Srilanka no Bangladés.
Jornalista: Natalino Belo
Editór: Xisto Freitas da Piedade
