DILI, 26 Novembru 2025 (TATOLI)—Ministériu Saude liuhusi Institutu Nasionál Saúde Públika Timor-Leste (INSPTL) hamutuk ho parseru dezenvolvimentu sira, halo lansamentu pakote formasaun integradu kuidadu saúde primária liuhusi programa dijitalizasaun iha formasaun servisu ba exelénsia klínika no la’ós klínika ka digitizing in service training for clinical and non-clinical excellence”
“Ohin loron, ita hamutuk ho parseru sira lansa programa distánsia, signifika ita atu dijitaliza tiha módulu formasaun ba iha in service training inklui módulu kliniku no noun kliniku, iha módulu noun kliniku nee ita ko’alia kona-ba jestaun no liderasa,” Prezidente INSPTL, Merita Monteiro, hateten ba jornalista sira iha Novu Turizmu, ohin.
Nia hateten, durante ne’e INSPTL halo formasaun ba kliniku no noun kliniku, maibé la’ós husi dijitál maibé uza manuál.
“Materiál sira-ne’e ita print pois mak ita fó ba pesoál saúde sira mak foin ita halo treinamentu, maibé agora importante tanba era ida-ne’e atu utiliza sistema dijital, entaun modulu sira-ne’e ita desenvolve hamutuk ho peritu sira husi área klinika médiku espesialista sira no mos jestór sira,” nia haktuir.
Nia hatutan, modolu sira-ne’ebé dijitaliza ona sei enkamiña ba diretór sentru saúde munisípiu sira hafoin halo treinamentu.
“Husi dijitalizasaun ida-ne’e ita bele poupa orsamentu ba iha formasaun ninian, bainhira ita lori hotu ema husi munisípiu mai formasaun iha Dili, ita sei gastu osan barak han-hemu no perdiem, maibé agora ho inovasaun foun ida-ne’e bele fó formasaun munisípiu de’it, depois husi nasional bele apoiu ita bele poupa osan barak liutan hodi fó treinu ema barak liutan ba área kliniku no noun kliniku nian,” nia dehan.
Nia mos akresenta oramentu ne’ebé formaliza modulu ba dijitalizasaun hetan apoiu husi Governu Austrália.
Vise-Ministru ba Fortalesimentu Institusionál, José dos Reis Magno, hateten fomasaun digitizing in service training for clinical and non-clinical excellence atu kontinua fó kapasitasaun ba pesoál saúde sira konstitui pilár ida estratéjiku hodi garante prestasaun servisu saúde ba populasaun.
“Implementasaun Digitalized In-Service Training reprezenta hakak ida desizivu iha modernizasaun ita-nia sistema, habelar asesu ba formasaun iha ita-nia fasilidade saúde tomak no promove padronizasaun neʼebé konsistente ba koñesimentu no kompeténsia,” nia dehan.
Nia mós hatutan, dijitalizasaun ba formasaun hodi substitui papel esensiál profisionál saúde, nia kapasidade no husi progama distánsia bele fó treina ema barak liu kualidade di’ak-liu no gasta tempu no osan mós menus.
Jornalista : Felicidade Ximenes
Editór : Cancio Ximenes
