DILI, 26 Novembru 2025 (TATOLI)—Vise Ministru ba Fortalesimentu Institusionál Saúde, Jose Magno dos Reis, rekoñese profisionál saúde menus maibé sistema saúde iha Timor-Leste ne’e funsiona nafatin.
“Atu komemora ita-nia proklamasaun indepedensia 28 novembru ba da-50 mak Ministériu Saúde ita nafatin menus profisionál saúde, maibé ita-nia atendimentu la’o nafatin maske ita-nia pesoál saúde seidauk masimu. agora profisionál saúde menus ne’e la signifika katak sistema saúde la funsiona ne’e lae. Maibé, funisonamentu ba fasilidade tomak husi Hospitál Nasionál Guido Valadares to’o postu saúde funsionamentu la’o di’ak hela,” Jose Magno dos Reis hateten ba Agência TATOLI iha Novu Turizmu, ohin.
Nia dehan, Ministériu Saúde nafatin halo planu di’ak ba oin, nune’e beibeik no neineik sei destaka pesoál saúde sira hotu ba fasilidade saúde sira iha Timor-Leste.
“Ita iha profisionál saúde sira destaka hotu iha postu saúde 340-resin ihaTimor-Leste, maibé iha ne’eba destaka ita-nia profisionál saúde na’in-ida (1) ka na’in-rua (2), entaun funsionamentu sira la’o hela,” nia dehan.
Tanba ne’e, iha tinan 2026, Ministériu Saúde sei nafatin tau prioridade ba rekursu umanu, nune’e bele destaka ba postu saúde no sentru saúde sira atu halo atendementu ba komunidade ne’ebé mak moras.
“Ita daududaun ne’e profisional saúde sira sei menus, tanba ne’e agora daudaun Ministériu Saúde loke ona vaga ba profisionál saúde sira bele compete. Tinan oin, ita nafatin loke rekrutamentu ba pesoál saúde, nune’e ita halo atendementu di’ak liután ba ita-nia komunidade,” nia hateten.
Jornalista : Felicidade Ximenes
Editór : Cancio Ximenes
