VIKEKE, 26 Novembru 2025 (TATOLI)–Sub Inspetora Administrasaun Finansa ba Auditoria no Inspesaun husi Ministériu Transporte no Komunikasaun (MTK), Anita do Santos Dias Ximenes Pires, informa MTK rekoñese espasu atendimentu iha Diresaun Nasionál Transporte Terrestre (DNTT) Munisípiu Vikeke la sufisiente.
“Husi ami-nia parte haree DNTT Munisípiu Vikeke nia atividade atendimentu la’ok di’ak, maibé espasu mak la sufisiente,” Anita ba TATOLI iha edifísiu DNTT, Vikeke, Kuarta ne’e.
Tuir nia loloos ne’e espasu atendimentu tenke luan nune’e diretór no funsionáriu sira bele atende kliente sira ho dignu.
“Fatin kloot halo funsionáriu sira ladún konfortvel iha atendimentu. Nune’e mós fatin rai kliente sira-nia dokumentu la seguru. Loloos ne’e fatin rai dokumentu ne’e tenke iha fatin seguru, tenke iha armáriu hodi asegura dokumentu sira,” nia esplika.
Notísia relevante: Kondutór Vikeke husu Governu konstrui estasionamentu ba transporte públiku sira
Provizoriamente DNTT Munisípiu Vikeke uutiliza sala rua husi Servisu Obra Públika Munisípiu Vikeke hodi halo atendimentu ba kliente sira.
Kona-ba estasionamentu ba transporte ne’ebé seidauk iha, tuir Anita, Governu presiza fó-atensaun ba estasiomentu tanba ne’e atu kontrola transporte.
Jornalista: Vitorino Lopes da Costa
Editór: Xisto Freitas da Piedade
