OEKUSI, 26 Novembru 2025 (TATOLI) – Hahú husi fulan Janeiru mai to’o Novembru 2025, ekipa husi Provedória Direitu Umanu no Justisa (PDHJ) Delegasaun Territóriál, Rejiaun Administrativa Espesiál Oekusi Ambeno (RAEOA), rejista keixa sia (9) ho indikasaun forte kona-ba violasaun boa-governasaun no violasaun direitu umanu.
“Husi Janeiru to’o agora, ita simu ona keixa husi komunidade hasoru autoridade públiku sira hamutuk sia (9), husi keixa sira-ne’e, iha indikasaun ba violasaun direitu umanu haat (4) no indikasaun ba violasaun boa-governasaun ne’e lima (5),” Diretór PDHJ Oekusi, Bartolomeo Gonçalves informa, iha Oekusi ohin.
Notísia relevante:PDHJ atualiza rezultadu fiskalizasaun no simu keixa ba dirijente Oekusi
Nia esplika, hafoin simu no rejista keixa hirak-ne’e, PDHJ kontinua enkamiña kedas ba nasionál atu halo investigasaun, no parte investigadór sira mós konklui ona prosesu investigasaun ba kazu lima, no relatóriu públika ona no rekomendasaun sira mós hato’o direita ona ba instituisaun kompetente.
Enkuandu kazu haat seluk, daudaun sei iha prosesu nia laran, sei halo investigasaun depoizde identifika katak, mosu violasaun kala’e.
“Tanba kazu sia-ne’e, komunidade sira rasik mak mai hato’o direita keixa ba edifisíu PDHJ Oekusi, atu hato’o sira-nia problema no preokupasaun ba autoridade públiku sira,” nia informa.
Notísia relevante:KFP-PDHJ deteta funsionáriu balun iha RAEOA manipula lista prezensa
Autoridade PDHJ ne’e, rejeita fó esplikasaun detallu kona-ba tipu keixa sia ne’e,tanba prosesu investigasaun ba kazu haat seluk sei kontinua la’o hela.
“Ein-jeralmente kazu sira-ne’e tama ona iha raan investigasaun, ne’eb’e ami relata de’it númeru, ami labele esplika klaru ba públiku, maibé klaru ona katak kazu lima mak konklui on aba produsaun relatóriu investigasaun, no rekomendasaun sira hato’o ona ba instituisaun relevante sira,” nia afirma.
Jornalista: Abílio Elo Nini
Editór: Rafael Ximenes de A. Belo
